„Á­sakanir Svan­dísar í minn garð eru lygi frá rótum“

 Í hlaðvarpinu sakaði Svandís Snorra um að „tendra bál fordóma“ og að ala á ótta með orðræðu sinni í forystu Miðflokksins. Þá sagði Svandís það „sorglegt“ að maður eins og Snorri væri kominn í stjórnmál og að hann væri að „fiska í gruggugu vatni“ með umræðu um útlendingamál í aðdraganda kosninga.“

„Ég veit ekki alveg til hvers er vísað. Ég veit þó að ég hef varað við því að misjafn árangur okkar við aðlögun innflytjenda að íslensku samfélagi geti dregið dilk á eftir sér. Með tíð og tíma geti skapast mikil félagsleg vandamál sem koma verst niður á börnum af erlendum uppruna, sem ná til dæmis aldrei að fóta sig í skólakerfinu,“ segir Snorri í svari á Facebook-síðu sinni um málið í dag.

Þar segir hann það merkilegasta við orð Svandísar að hún hafi ekki fyrir því að nefna dæmi sem styðji mál hennar.

Aldrei tjáð hatur í garð útlendinga, kvenna eða hinsegin fólks

„Hún lætur duga að klína þessu bara á mig. Dæmið gengur þó ekki upp, því að ég hef aldrei á ævi minni tjáð mig af hatri í garð útlendinga, kvenna eða hinsegin fólks. Það get ég fullyrt með góðri samvisku, enda hata ég ekki nokkurn mann,“ segir Snorri og spyr hvað drífi Svandísi áfram í að tala svona um hann og ákveða, fyrir hann, hvern hann hatar eða að hann hati einhvern yfirleitt.

„Í gegnum tíðina hefur flokkur Svandísar boðað opnari útlendingastefnu en flestir aðrir flokkar á Alþingi. Á síðasta áratug hefur gífurlegur fjöldi fólks flutt hingað til lands á ýmsum forsendum án þess að ráðrúm hafi gefist til að taka vel á móti því öllu. Innviðir samfélagsins hafa ekki farið varhluta af þessu, hvort sem það er heilbrigðiskerfi, húsnæðismarkaður eða skólakerfi. Íslensk tunga er víða ekki aðaltungumálið lengur, sem er sérstakt áhyggjuefni sem ég hef m.a. nefnt í sambandi við skólakerfið,“ segir Snorri og að ríkisstjórn Vinstri grænna hafi brugðist skyldum sínum gagnvart innflytjendum, og þar með samfélaginu öllu.

Áróðursherferð gegn ungum frambjóðanda

Hann segir Svandísi og félaga hennar í ríkisstjórninni, sem voru Sjálfstæðisflokkur og Framsóknarflokkurinn, hafa byggt upp skýjaborgir. Þau hafi boðið fólki til landsins án þess að forsendur væru fyrir boðinu.

„Á meðan þau ornuðu sér við yl eigin mannúðar, fann almenningur fyrir áhrifunum. En þær áhyggjur almennings ollu Svandísi ekki áhyggjum. Það er fyrst þegar einhver segir hlutina upphátt sem bregðast þarf við af hörku,“ segir Snorri.

Þess vegna hafi Svandís ákveðið að fara í „rætna áróðursherferð gegn ungum frambjóðanda í von um að breiða yfir afleiðingar eigin draumórapólitíkur.“ Hún misbeiti orðinu hatur og gengisfelli það enn frekar.

„Vitandi hið sanna í málinu, get ég fullyrt að ásakanir Svandísar í minn garð eru lygi frá rótum. Ég finn það því á eigin skinni að þessum rótgróna stjórnmálamanni er ekki lengur treystandi fyrir þessari ábyrgð. Þegar stöðu hennar er ógnað stenst hún ekki freistinguna. Það er í alvöru sorglegt,“ segir Snorri að lokum.

Færsluna er hægt að lesa í heild sinni hér og hlusta á hlaðvarpið hér að neðan.