Mennirnir sem allir eru að tala um: Hverjir eru Costco-gæjarnir og Rizzlerinn?

Fólk sem er ekki sítengt netinu hefur sennilega aldrei heyrt um fyrrnefnda menn. Hingað til hafa þeir haldið sig meira og minna á TikTok en á fimmtudaginn birtust þeir hins vegar á sjónvarpsskjám Bandaríkjamanna þegar þeir voru gestir Jimmy Fallon í The Tonight Show.

Viðtalið vakti athygli, ekki síst vegna þess hve vandræðalegt það var og hvað Fallon sjálfur virtist hafa lítinn áhuga á þremenningunum. En við komum aftur að því síðar, fyrst verður gerð tilraun til að komast að því hverjir þessir menn eru og hvað gerir þá vinsæla.

Sjarmatröll í þriðja bekk

Rizzlerinn (e. The Rizzler) er strákur frá New Jersey sem heitir Christian og er í þriðja bekk. Hann vakti fyrst athygli í fyrra vegna persónutöfra sinna og sjarma. Síðan þá hefur hann, með hjálp foreldra sinna, skapað sér nafn á TikTok með ýmiss konar frösum og geiflum.

Þekktastur er hann fyrir einkennissvip sinn, svokallaðan rizz-svip (e. rizz-face). Orðið „rizz“ getur verið bæði nafnorð sem lýsir útgeislun eða sögn sem lýsir viðreynslu og er dregið af orðinu „charisma“. 

Svipurinn má segja að sé bland af Bláu stáli fyrirsætunnar Zoolanders úr samnefndri mynd og illskuglotti Dr. Evil í Austin Powers-myndunum.

Rizz-svipur Rizzlersins felst í því að hann lyftir annarri augabrúninni, ýtir hinni niður, setur tunguna upp í góm (sem kallast víst að mew-a) og sýgur inn kinnarnar. Yfirleitt strýkur hann sér líka um hökuna eins og spekingur. Þetta gerir hann aftur og aftur í myndböndum og á myndum og enn sem komið er virðist fólkið ekki fá nóg af honum.

Costco-feðgar sem segja „BOOM!“

Costco-gæjarnir eru feðgarnir Eric Befumo, ellefu ára strákur sem kallar sig Réttlætið mikla (e. Big Justice) og Andrew „A.J.“ Befumo, fyrrverandi áhugamannaglímukappi sem gekk þá undir sviðsnafninu „the American Powerchild Eric Justice“.

Eins og nafnið gefur til kynna tengist samfélagsmiðlaefni þeirra Costco að miklu leyti. Þeir sérhæfa sig fyrst og fremst í matarrýni á vörum sem eru seldar í versluninni. Rýnin einkennist af leikrænum lýsingum og upphrópunum og fær maturinn einkunn á „BOOM“-skala.

Maturinn fær ýmist eitt eða fleiri BOOM, eitt stórt BOOM ef hann er sérlega eða jafnvel DOOM ef hann veldur vonbrigðum. 

Þar að auki sýna feðgarnir frá verslunarleiðöngrum sínum í Costco og hafa gefið út lagið „We Bring the BOOM!“.

Myndböndin eru ekki sérlega löng eða flókin í uppsetningu. Því vakti töluverða athygli þegar það kom í ljós hvað A.J. er kröfuharður leikstjóri bakvið tjöldin. Það má sjá í myndbandinu hér að neðan.

Virtist fyrirlíta þremenningana

Undirritaður hélt lengi vel að Costco-gæjarnir og Rizzlerin væru skyldir, þ.e. að strákarnir tveir væru bræður, en svo er ekki. Þeir eru bara vinir.

Réttlætið mikla lýsti því í viðtalinu hjá Fallon að hann hafi séð myndbönd Rizzlersins og sagt við föður sinn að þeir yrðu að hittast. Síðan þá koma þeir gjarnan fram saman, nú síðast hjá Jimmy Fallon.

Þremenningarnir ræddu þar um nýtilkomna frægð sína og borðuðu með honum smákökur. Einna áhugaverðast við heimsóknina var að Fallon virtist hvorki vita hverjir mennirnir væru né hafði hann mikinn áhuga á þeim. Eftir því sem á leið virtist fyrirlitning Fallon á mönnunum aukast.

Í kjölfarið spruttu upp alls konar „meme“ og grín um heimsóknina þar sem mennirnir eru hafðir að háði og spotti.

Fyrir ofan er þeim líkt við Pokemon-dýr og hér fyrir neðan eru þeir settir í samhengi við rauða herbergið í Twin Peaks. 

Þrátt fyrir þessa umfjöllun sem rekur feril mannanna og viðtalið hjá Fallon mætti segja að maður sé litlu nær um það hvers vegna Rizzlerinn og Costco-gæjarnir eru svona vinsælir. Kannski er það til marks um það hvað samfélagsmiðlar eru orðnir úrkynjaðir eða hvað börn eru óútreiknanleg í samfélagsmiðlaneyslu sinni.