Átta marka jafn­tefli í toppslag ítalska boltans

Piotr Zielinski kom heimamönnum í Inter yfir með marki af vítapunktinum á 15. mínútu áður en Dusan Vlahovic jafnaði metin fyrir gestina fimm mínútum síðar. Timothy Weah skoraði svo annað mark Joventus á 27. mínútu, en Henrikh Mkhitarian jafnaði metin á ný fyrir Inter á 35. mínútu.

Tveimur mínútum síðar skoraði Piotr Zielinski annað mark sitt og þriðja mark Inter, aftur af vítapunktinum, og sá til þess að heimamenn fóru með 3-2 forystu inn í hálfleikshléið.

Síðari hálfleikur var svo ekki minna fjörugur en sá fyrri. Denzel Dumfries kom heimamönnum í 4-2 snemma í síðari hálfleik, en á 61. mínútu kom Kenan Yildiz inn af varamannabekk Juventus og sá átti heldur betur eftir að setja svip sinn á leikinn.

Yildiz minnkaði muninn fyrir gestina á 71. mínútu áður en hann jafnaði metin og tryggði Juventus eitt stig rúmum tíu mínútum síðar.

Niðurstaðan því 4-4 jafntefli í mögnuðum leik. Inter er nú með 18 stig í öðru sæti deildarinnar eftir níu umferðir, fjórum stigum á eftir toppliði Napoli og einu stigi á undan Juventus sem situr í þriðja sæti.