Ætlar ekki að leyfa Úkraínu að eignast kjarn­orku­vopn

Pútín sagði ómögulegt að sigra Rússa á vígvellinum og kallaði rússneska herinn einn þann öflugasta í heimi.

Þetta sagði Pútín á fundi BRICS ríkjanna sem stendur nú yfir í Moskvu í Rússlandi. Hann er eini þjóðarleiðtoginn á fundinum en erindrekar annarra ríkja eru þar, auk blaðamanna. Pútín ávarpaði fundinn og svaraði síðan spurningum blaðamanna.

Sergei Lavrov, utanríkisráðherra Rússlands, hafði áður slegið á svipaða strengi. Hann sagði ráðamenn í Úkraínu óða og staðhæfði að þeir myndu ekki eignast kjarnorkuvopn.

Ráðamenn í Rússlandi, og þar á meðal Pútín sjálfur, hafa ítrekað hótað notkun kjarnorkuvopna frá því innrásin í Úkraínu hófst. Það hefur sömuleiðis ítrekað verið gert í ríkisreknum sjónvarpsstöðvum Rússlands og dagblaða. Hótunum þessum hefur að miklu leyti verið ætlað að draga úr vilja Vesturlanda til að standa við bakið á Úkraínumönnum.

Vólódímír Selenskí, forseti Úkraínu, sagði í vikunni að ef ríkið fengi ekki inngöngu í Atlantshafsbandalagið þyrftu forsvarsmenn þess að finna aðrar leiðir til að reyna að koma í veg fyrir aðra innrás Rússa í framtíðinni. Þar kæmu kjarnorkuvopn til greina.

Úkraínumenn hafa lengi talað um að ef þeir semji við Rússa um að binda enda á núverandi stríð í skiptum fyrir það að Rússar fái að halda einhverjum svæðum Úkraínu, treystu þeir ekki Rússum til að standa við þau orð.

Rússar væru í betri stöðu en Úkraínumenn til að byggja upp efnahag sinn og her á nýjan leik, vegna þeirra miklu skemmda sem árásir Rússa hafa valdið í Úkraínu. Þeir gætu varið nokkrum árum í að byggja herinn upp og gert svo aðra innrás.

Þess vegna segjast Úkraínumenn þurfa góðar og bindandi öryggisráðstafanir og er innganga í NATO efst á óskalista þeirra.

Selenskí sagði kjarnorkuvopn koma til greina en aðrir ráðamenn í Úkraínu hafa sagt að þeir gætu þróað kjarnorkuvopn á tiltölulega stuttum tíma. Sérfræðingar segja það þó hæpið og að mjög erfitt sé að gera það á laun.

Kallaði eftir fjárfestingu

Á fundinum í Moskvu kallaði Pútín eftir því að hin BRICS-ríkin fjárfestu í Rússlandi. Í frétt Moscow Times segir að í síðustu skýrslu sem Seðlabanki Rússlands hafi gefið út opinberlega um erlenda fjárfestingu, sem var í janúar 2022, hafi hin BRICS-ríkin fjárfest í Rússlandi fyrir um 3,8 milljarða dala.

Það var minna en eitt prósent af allri erlendri fjárfestingu í landinu.

Mikið mannfall

Fregnir hafa borist af því að Kim Jon Un, einræðisherra Norður-Kóreu, hafi sent sérsveitarmenn til Rússlands, þar sem þeir eru nú sagðir í þjálfun áður en þeir verða sendir til Úkraínu. Kim er einnig sagður ætlað að senda um tólf þúsund hermenn til viðbótar til Rússlands.

Sjá einnig: Kim sagður ætla að senda tólf þúsund menn til Rússlands

Blaðamenn BBC í Rússlandi og blaðamenn rússneska útlagamiðilsins Mediazona hafa lengi vaktað dánargreinar og önnur opin gögn sem varpað geta ljósi á mannfall meðal rússneskra hermanna í Úkraínu.

Þeir hafa staðfest dauða að minnsta kosti 74.014 hermanna.

Þá segja þeir að mikil fjölgun hafi orðið á dánargreinum á undanförnum vikum. Undanfarnar þrjár vikur hafi greinar um um það bil þúsund fallna hermenn verið birtar á viku, að meðaltali.

Fregnir hafa borist af miklu mannfalli hjá Rússum á undanförnum mánuðum, þar sem þeir hafa staðið í linnulausum árásum og sóknum gegn Úkraínumönnum í austurhluta Úkraínu.

Í heildina áætla áðurnefndir blaðamenn að 134.900 til 188.000 rússneskir hermenn hafi fallið frá því innrásin í Úkraínu hófst. Þar eru meðtaldir menn frá Lúhansk og Dónetsk í Úkraínu.

Séu alvarlega særðir taldir með sé fjöldinn á bilinu 404.700 til 564 þúsund.