Upp­stilling á fram­boðs­lista „ekki A-kostur“

„Það er skammur tími til stefnu þegar svona aðstæður skapast. Það liggur beinast við að það verður að stilla upp sterkum lista um land allt. Ég á auðvitað eftir að ræða við kjördæmisráð, sem funda um slíka uppstillingu. Tímaramminn býður í raun ekki upp á annað en uppstillingu,” sagði Kristrún Frostadóttir formaður Samfylkingarinnar í samtali við fréttastofu í gær, í framhaldi af ákvörðun forsætisráðherra um að fara fram á þingrof og að boðað verði til kosninga í lok nóvember.

Samkvæmt skuldbindandi reglum Samfylkingarinnar um aðferð við val á framboðslista skulu kjördæmisráð, fulltrúaráð eða aðildarfélag ákveða, í samræmi við reglur flokksins, með hvaða hætti skuli velja á framboðslista Samfylkingarinnar.

„Samkvæmt 9.11 gr. laga Samfylkingarinnar skulu kjördæmisráð ákveða framkvæmd og fyrirkomulag niðurröðunar á framboðslista Samfylkingarinnar við alþingskosningar og skal valið fara fram eftir reglum sem flokksstjórn samþykkir,“ segir í reglum Samfylkingarinnar um ákvörðun um aðferð við val á framboðslista.

Tillagan liggur ekki fyrir enn

„Það verður fundur kjördæmisráðsins verður haldinn á laugardaginn og í ljósi nýjustu tíðinda í sambandi við kosningar verður lögð fram tillaga þar um hvernig þessu verður háttað,“ segir Unnar Jónsson sem er fulltrúi Norðausturkjördæmis í kjördæmisráði Samfylkingarinnar. „Tillagan liggur ekki fyrir ennþá. En ég held að ef maður horfi á dagatalið þá sé þetta bara staðan sem uppi er, hjá okkur og öðrum, það er ekkert flókið í sjálfu sér.“

Ekki sé seinna vænna en að ákveða þetta á laugardag, en forseti Ísland hyggst greina frá afstöðu sinni um beiðni forsætisráðherra um þingrof síðar í vikunni.

Allt stefni í uppstillingu

Guðmundur Ari Sigurjónsson, formaður framkvæmdastjórnar Samfylkingarinnar, tekur í svipaðan streng og formaðurinn. „Það stefnir allt í uppstillingu einfaldlega vegna þess að við höfum ekki tíma í neitt annað en uppstillingu. En við erum náttúrlega ekki komin með nákvæmar dagsetningar, nú er forsetinn búinn að segjast ætla að íhuga þessa beiðni Bjarna. Þannig við bíðum náttúrlega og sjáum hver tímalínan verður en miðað við þá tímalínu sem var talað um að það verði kosið í nóvember þá munum við fara í uppstillingu í öllum kjördæmum að öllum líkindum,“ segir Guðmundur Ari.

Skipulag flokksins sé vissulega þannig að kjördæmaráðin taki endanlega ákvörðun um þetta. Kjördæmaráðum sé í sjálfvald sett að taka ákvörðun um uppröðun á lista í hverju kjördæmi fyrir sig, þannig heimild er til staðar til að nýta aðrar leiðir við val á lista, svo sem prófkjör. „En svona út frá þeim skrefum sem þarf að fara ef það á að fara í prófkjör þá er það bara ekki raunhæft,“ segir Guðmundur Ari.

Þegar hafa verið boðaðir fundir með öllum kjördæmaráðunum. „Ef það breytist eitthvað þá munum við taka bara samtalið aftur við kjördæmaráðin.“

Er einhugur um þetta fyrirkomulag?

„Þetta er ekki A-kostur. Þetta eru ekki þær tímalínur sem við viljum endilega viljað. En við vorum samt undir þetta búin að þetta gæti gerst þannig að í þessari stöðu þá er alla veganna fullur skilningur að ég tel,“ svarar Guðmundur Ari.