Sjáðu fyrstu mörk Orra Steins í treyju Real Sociedad

Sociedad keypti Orra Stein sem hafði byrjað tímabilið af gríðarlegum krafti með FCK. Það hefur tekið hinn tvítuga framherja sinn tíma að venjast hlutunum á Spáni en fyrir leikinn gegn Valencia hafði hann spilað fimm leiki án þess að finna netmöskvana, það breyttist á laugardag.

Orri Steinn hóf leik á varamannabekknum en kom inn á þegar hálftími lifði leiks. Á 74. mínútu var hann nálægt því að skora þegar hann renndi sér á fyrirgjöf frá vinstri en Giorgi Mamardashvili varði vel í marki Valencia.

Þegar tíu mínútur voru til loka venjulegs leiktíma fór Sociedad í skyndisókn. Brais Méndez, sem hafði einnig komið inn af bekknum, keyrði að marki áður en hann renndi boltanum þvert fyrir markið þar sem Orri Steinn skilaði knettinum við mikinn fögnuð viðstaddra og staðan orðin 2-0.

Í uppbótartíma leiksins komust Sociedad í aðra slíka skyndisókn. Nú var það Sergio Gómez sem renndi boltanum frá vinstri á Orra Stein sem skoraði í fyrsta þrátt fyrir að varnarmaður Valencia hafi rennt sér í íslenska framherjann í þann mund sem hann skilaði boltanum í netið.

Real Sociedad vann leikinn 3-0 en þetta var aðeins annar sigur liðsins í átta deildarleikjum. Liðið situr um þessar mundir í 12. sæti með 8 stig, sex stigum frá Mallorca sem situr í 4. sæti.