Á annað hundrað kvenna bíða eftir minni brjóstum

Þetta kemur fram í svari Willums Þórs Þórssonar heilbrigðisráðherra við fyrirspurn Diljár Mistar Einarsdóttur þingmanns Sjálfstæðisflokksins. Hún vildi fá að vita hvernig samningaviðræðum Læknafélags Íslands og Sjúkratrygginga liði um greiðsluþátttöku í slíkum aðgerðum fyrir þá skjólstæðinga sem hafi sjálfir þurft að greiða fyrir þær.

„Sjúkratryggingar Íslands og Læknafélag Reykjavíkur undirrituðu samning til fimm ára í september 2023. Samningurinn tryggir greiðsluþátttöku almennings fyrir þær aðgerðir sem falla undir samninginn. Samkvæmt upplýsingum frá Sjúkratryggingum Íslands hefur staðið yfir vinna með samningsaðilum frá síðastliðnu hausti við að fara yfir gjaldskrár sérgreinalækna. Þeirri vinnu er ekki lokið en m.a. er gjaldskrá skurðlækna til skoðunar og þar á meðal aðgerðir til brjóstaminnkunar. Lýtalæknar hafa gerst aðilar að samningnum og fá því einstaklingar sem fá þjónustu þeirra lækna greiðsluþátttöku á þeim læknisverkum sem samningurinn tekur til,“ segir í svari ráðherra.

Diljá spurði ennfremur út í hve langur biðlistinn væri. Í svarinu kemur fram að 139 konur hafi í janúar beðið eftir aðgerð samkvæmt mælaborði um bið eftir heilbrigðisþjónustu sem finna má á vef embættis landlæknis.

„Landspítali hefur unnið að sérstöku átaki til að stytta bið eftir brjóstaminnkunaraðgerð með því að leigja afnot af skurðstofu utan spítalans. Það verkefni gengur vel og er gert ráð fyrir að biðtími eftir umræddum aðgerðum verði innan viðmiðunarmarka við lok árs 2024.“

Þá kemur fram í svari ráðherra að gerð sé krafa um BMI-stuðul innan við 27 til að fá að fara í aðgerð. Það sé í samræmi við opinber sjúkrahús á Norðurlöndum.