Rodri og Morata í bann fyrir söng um Gíbraltar

Bannið fá þeir fyrir söng sem þeir tóku er Spánverjar urðu Evrópumeistarar. Það er ekki svo að söngurinn sem slíkur hafi verið svo slæmur að hann kallaði á bann heldur var það textinn.

Þeir félagar sungu að Gíbraltar væri hluti af Spáni í sigurgleðinni.

Knattspyrnusambandi Gíbraltar var ekki skemmt er þeir heyrðu sönginn og kærðu til UEFA.

Bannið fá þeir í raun fyrir óíþróttamannslega hegðun. Þeir munu því missa af leik Spánverja og Serba í byrjun næsta mánaðar.

Bretar ráða Gíbraltar en Spánverjar hafa lengi kallað eftir því að fá aftur yfirráð yfir dvergríkinu.