Fjöldi spjalda og gróf brot í fyrsta leik tíma­bilsins

Fyrri hálfleikur bauð upp á lítið fjör en það færðist í aukana í þeim seinni. Aleksander Vukotic byrjaði á því að setja boltann óvart í eigið net og koma Düsseldorf yfir. 

Hann fékk svo gult spjald fyrir gróft brot á 78. mínútu og upp varð mikið fjaðrafok. Leikmenn tókust á og rifust hver við annan og dómarann. Ísak Bergmann uppskar gult spjald fyrir kjaftbrúk. 

Mínútu síðar fékk svo Darmstadt maðurinn Othmane El Idrissi rautt spjald fyrir að tækla aftan í mann sem var sloppinn inn fyrir. 

Manni fleiri tókst Düsseldorf að setja eitt mark til viðbótar og fagna 2-0 sigri í fyrstu umferð deildarinnar.