Emil og Ása keyptu 330 milljóna ein­býli í Foss­vogi

Fyrri eigendur eru hjónin, Eyjólfur Baldursson og Þórdís Sigurgeirsdóttir, eigendur verslunarinnar Eirvík.

Umrætt hús er 366,7 fermetrar að stærð og byggt árið 1970. Auk þess eiga þau 300 fermetra einbýlishús við Kinnargötu í Garðabæ.

Emil og Ása hafa búið á Ítal­íu síðastliðin sautján ár þar sem Emil var atvinnumaður í knattspyrnu. Saman eiga hjónin tvö börn.

Emil lék síðustu tvo tímabil með Virtus Verona en árið 2005 fór hann fyrst út í atvinnumennsku frá FH og samdi við enska úrvalsdeildarfélagið Tottenham. Fljótlega lá leiðin til Ítalíu þar sem hann var í sextán ár. Á Ítalíu lék Emil með sex liðum og lengst af hjá Hellas Verona þar sem hann fór með liðinu úr ítölsku C-deildinni upp í Seríu A.

Hann lagði skóna á hilluna í fyrra en er aftur á móti ekki búinn að slíta sig alfarið frá boltanum og rekur í dag knattspyrnuskóla fyrir ungmenni við Gardavatnið á Ítalíu. Þá hefur hann spreytt sig í umboðsmennsku og hafði til dæmis milligöngu um lánssamning Adams Ægis Pálssonar frá Val til Perugia á Ítalíu.

Hjónin reka saman fyrirtækið Olifa, sem flytur inn ítalskan mat, vín og krydd, og veitingastaðinn OLIFA - La Madre Pizza á Suðurlandsbraut.

„Þetta var í eldhúsinu okkar í Udine á Ítalíu, þegar Emil spilaði með Udinese. Þarna byrjuðum við að smakka olíur og leita að vönduðum framleiðendum sem féllu að okkar hugmyndum um uppruna, vinnsluaðferðir, sjálfbærni og svo framvegis. Ég bjó svo til logoið og línurnar voru lagðar fyrir framhaldið. Tíminn leið og 2018 stofnuðum við Olifa á Íslandi formlega. Olifa hefur því núna verið stór partur af lífi okkar síðastliðin fimm ár og er að dafna mjög vel,“ sagði Ása í samtali við Makamál á Vísi árið 2021.