Að­eins glöggir finna breytingarnar á merki Feyenoord

Hollenska félagið Feyenoord var að missa knattstpyrnustjóra sinn til Liverpool. Hvort að brotthvarf Arne Slot sé kveikjan að breytingu á merki félagsins er ólíklegt en nýtt merki var í það minnsta kynnt í gær.

Félagið gaf það út fyrir nokkru að það væri von á nýju merki fyrir 2024-25 tímabilið.

Stuðningsmenn bjuggust örugglega við talsverðum breytingum á merkinu sem hefur verið eins frá árinu 2009. Það er líka mjög líkt því merki sem var við lýði þegar Pétur Pétursson fór á kostum með Feyenoord í kringum 1980.

Það sem vakti því mesta athygli á netmiðlum var að breytingarnar voru á endanum mjög fíngerðar. Aðeins glöggir fundu í raun þessar breytingar á merkinu.

Alls voru gerðar fjórar breytingar og nú er spurningin hvort þú lesandi góður getir fundið þær.