Gæti reynst erfitt að senda Kourani úr landi

Hann kom hingað til lands árið 2018 og fékk þá alþjóðlega vernd.

Frosti Logason fjölmiðlamaður og Helga Vala Helgadóttir, lögmaður og fyrrverandi þingmaður, ræddu mál Kourani í Bítinu á Bylgjunni í morgun.

Helga Vala útskýrði að í lögum sé heimild fyrir því að afturkalla dvalarleyfi, en ekki vernd, en það megi sleppa því að endurnýja verndina sé einstaklingur með opið mál í kerfinu eða dóm. Þrátt fyrir það séu ákveðin ríki sem ekki megi senda fólk aftur til. Kourani kom frá Sýrlandi, en Helga Vala segist ekki vita til þess að fólk sé sent aftur vegna ástandsins þar.

„Þessi einstaklingur hlaut vernd á Íslandi sem þýðir að hann hefur ekki komið við annars staðar á leiðinni, bara svo það sé á hreinu. Við erum búin að viðurkenna að við vorum fyrsta ríkið,“ sagði Helga Vala.

„Við getum ekki bara sent hann eitthvert,“ segir hún og bendir á ástandið á Sýrlandi hafi batnað, en það séu enn að koma flóttamenn frá landinu, en á sama tíma séu sumir að snúa þangað aftur.

„Það er ekki sama hættuástandið og var þannig mögulega getum við sent hann til baka. Það fer svolítið eftir því hvaðan hann kemur.“

Fangaverðir súpi hveljur

Greint var frá því á Nútímanum í vikunni, miðli Frosta, að ófremdarástand ríkti í fangelsinu á Litla-Hrauni, þar sem Kourani dvelur um þessar mundir.

„Við fáum það staðfest að það sé mikill viðbúnaður, þar sem að miklu þarf að kosta til vegna eins fanga. Það er þessi umræddi Mohamad Kourani. Fangavörðum og öðrum föngum stafar ógn af þessum manni,“ sagði Frosti í Bítinu.

„Sakaferill hans hefur verið viðstöðulaus. Nú er svo komið að yfir honum vofir sex til átta ára fangelsisdómur, og maður heyrir það að starfsfólk á Litla-Hrauni sýpur hveljur. Því þetta býður upp á ástand sem þau telja sig ekki ráða við.“

Almenningi misboðið

Frosti sagðist skynja það að réttarvitund almennings sé misboðið. Fólk spyrji sig hvers vegna Kourani sé ekki vísað á brott.

„Mér finnst augljóst að ef við þurfum að sitja uppi með þennan Svarta Pétur þá eru þessar alþjóðlegu skuldbindingar sem við gögnumst undir eitthvað sem þarf að skoða betur. Því þetta er algjörlega ólíðandi að samfélagið þurfi að taka þennan kostnað á sig.“

Bæði Frosti og Helga vala minntust á að Guðrún Hafsteinsdóttir dómsmálaráðherra hafi talað um að gera breytingar á lögum til að koma í veg fyrir að staða sem þessi myndist.

Ekki heill

Helga Vala sagði að miklar breytingar hafi orðið á þeim hópi þeirra sem afplána í fangelsi á síðustu árum eftir að heimildir til að taka út dóma í samfélagsþjónustu voru víkkaðar. „Þá eru í rauninni veikari einstaklingar inni, sem eru að bæði að koma úr mögulega mikilli neyslu og með ýmis konar geðveikindi.“

Að hennar sögn eru þó fleiri einstaklingar að afplána í mjög erfiðu ástandi. „Mér hefur verið sagt að það séu viðvarandi fjórir einstaklingar í geðrofsástandi. Það er bara hættulegt ástand fyrir þá sjálfa, fyrir aðra fanga, og fyrir fangaverði.“

Helga bætti þó við að ekki væru allir í geðrofsástandi hættulegir og ekki allir hættulegir í geðrofsástandi. Í því samhengi minntist hún á erjur glæpahópa sem hafa teygt sig inn í fangelsin.