Úr boltanum í tryggingarnar

Greint var frá því á dögunum Bjarni muni láta af störfum sem framkvæmdastjóri KR að eigin frumkvæði í lok ágústmánaðar.

Í fréttatilkynningu frá VÍS segir að Bjarni muni snúa aftur til VÍS í haust. Hann þekki tryggingamarkaðinn vel þar sem hann hafi áður starfað sem viðskipta- og sölustjóri í sjávarútvegi hjá VÍS. Bjarni hafi einnig verið sölustjóri í sjávarútvegi hjá Odda og rekstrarstjóri hjá Ellingsen. 

Bjarni sé þekktur fyrir feril sinn í fótbolta en hafi einnig þjálfað fjöldamörg lið, hérlendis sem erlendis.

Hann sé með BS-gráðu í viðskiptafræði frá Háskólanum í Reykjavík og ECA-gráðu í stjórnun íþróttafélaga (e. Club Management Program) ásamt þjálfaraleyfi.

„Ég hlakka virkilega til að snúa aftur til VÍS enda eru mörg spennandi verkefni fram undan. Ég hef fylgst vel með félaginu undanfarin ár og er stoltur af metnaðarfullum markmiðum þess á markaði. Ég hlakka til að leggja mitt af mörkum til þess að þau verði að veruleika,“ er haft eftir Bjarna.

„Ég er spennt að fá Bjarna aftur í teymið enda er hann vel kunnugur félaginu. Hann er öflugur stjórnandi og góður liðsfélagi. Hann verður í lykilhlutverki að tryggja áframhaldandi vöxt til framtíðar,“ er haft eftir Ingibjörgu Ásdísi Ragnarsdóttur, framkvæmdastjóra sölu og þjónustu hjá VÍS.