Fyrsta flugi Icelandair til Pittsburgh fagnað

„Norður-Ameríku markaður hefur verið mjög sterkur hjá okkur og hafa Bandaríkjamenn fest sig í sessi sem fjölmennastir ferðamanna sem heimsækja Ísland,“ segir Bogi Nils Bogason, forstjóri Icelandair, í tilefni fyrsta Pittsburgh-flugsins.

Aðeins eitt annað flugfélag flýgur núna beint milli Evrópu og Pittsburgh en það er British Airways. Breska félagið býður upp á sex ferðir í viku milli London Heathrow og Pittsburgh.

„Pittsburgh-flugið fer vel af stað og er ánægjulegt að sjá að farþegar frá 25 Evrópulöndum hafa bókað flug með okkur til Pittsburgh um Ísland og þaðan hafa farþegar bókað flug til 30 áfangastaða Evrópumegin,“ segir Bogi.

Boðið verður upp á fjögur flug í viku fram til októberloka. Fyrsta ferðin í gær, undir stjórn Sigrúnar Bender flugstjóra, var flogin á Boeing 737 MAX 8 og tók flugið tæpar sex klukkustundir.

„Við á Keflavíkurflugvelli óskum Icelandair til hamingju með nýjasta áfangastað sinn, Pittsburgh, og erum sannfærð um að viðbótin eigi eftir að skila sér margfalt til flugfélagsins og farþega þess,” segir Sveinbjörn Indriðason, forstjóri Isavia. 

„Það er fagnaðarefni í hvert sinn sem nýr áfangastaður bætist við á Keflavíkurflugvelli. Alþjóðasamtök flugvalla, Airport Council International, segja að 10% aukning í flugtengingum auki hagvöxt um 0,5% og það er ekki hvað síst ástæða til að fagna hverri nýrri viðbót okkar öflugu flugfélaga,” segir Sveinbjörn.

Þrjár Boeing MAX eru að bætast í flota Icelandair þetta vorið. Flugflotinn í farþegafluginu mun þá samanstanda af 42 flugvélum, þar af 21 af gerðinni 737 MAX.

Pittsburgh er önnur stærsta borg Pennsylvaníu á eftir Philadelphiu. Hún liggur á bökkum þriggja fljóta og er fyrir vikið kölluð borg brúanna. Í frétt frá Icelandair segir að borgin hafi upp á margt að bjóða; menningu, fagurgræna almenningsgarða, áhugaverðar söguslóðir, útivist og íþróttaviðburði.

Halifax á austurströnd Kanada er einnig að bætast við sem áfangastaður á ný hjá Icelandair eftir nokkurra ára hlé. Flugið hefst 31. maí og verður flogið þrisvar í viku fram í miðjan október. Halifax er höfuðborg Nova Scotia og er henni lýst sem lifandi hafnarborg og iðandi miðstöð verslunar og viðskipta.