„Einn mjög fárra karla á mínum aldri sem er ekki í golfi!“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Klukkan er stillt á 6.40 alla virka daga og sú stilling hefur ekki breyst í mörg ár. Þetta var fótaferðartíminn þegar krakkarnir okkar voru enn heima og þó þau séu fyrir löngu flogin úr hreiðrinu, hefur þessum tíma ekki verið breytt. 

Ég verð því að gera þá játningu að vera mjög vanafastur og hef tekið dræmt í hugmyndir eiginkonu minnar um allar breytingar í þessu efni.“

Hvað er það fyrsta sem þú gerir á morgnanna?

„Hér er allt í föstum skorðum líka, eftir sturtu og rakstur, er það fyrsti kaffibollinn með ristuðu brauði með osti. Eftir þessa fyrstu máltíð dagsins held ég fullur bjartsýni til móts við verkefni dagsins og er oftast mættur á skrifstofuna ekki seinna en klukkan hálf átta.“

Hver eru skemmtilegustu áhugamálin á þessum árstíma?

„Á þessum tíma árs snýst tíminn fyrir utan vinnuna mikið um hestamennskuna, enda er hún eitt aðal áhugamálið. Ég sem sagt er einn mjög fárra karla á mínum aldri sem er ekki í golfi! 

Þegar þú ert með hesta á húsi fylgir því sú skylda að moka skít og gefa hey á hverjum degi ásamt því að hreyfa og þjálfa hestana. Hestum líður nefnilega best þegar þeir eru í passlegri þjálfun. 

Hestamennskan hefur fært mér óteljandi ánægjustundir, ekki síst í hinum fjölmörgu hestaferðum sem ég hef farið með vinum mínum vítt og breytt um landið.“

Í hvaða verkefni ertu að vinna helst þessa dagana?

„Nú í vikunni hélt SVÞ upp á tuttugu og fimm ára afmæli samtakanna með frábærlega vel heppnaðri ráðstefnu sem sótt var af 250 manns. Það var varpað ljósi á hinar óteljandi áskoranir sem við fyrirtækjum í verslun og þjónustu blasa nú þegar allar breytingar í umhverfi fyrirtækja gerast með meiri hraða en nokkru sinni fyrr. 

Slíkt leggur auknar skyldur á hagsmunasamtök á borð við SVÞ um að halda vöku sinni og fylgjast vel með öllu sem er að gerast í umhverfinu. Það hefur því verið stóra verkefnið undanfarnar vikur að undirbúa ráðstefnuna, en ég tek það skýrt fram að mitt frábæra samstarfsfólk hefur borið hitann og þungann af undirbúningi ráðstefnunnar og þau lögðu sig öll fram um að gera ráðstefnuna eins glæsilega og raun bar vitni.“

Hvernig skipuleggur þú þig í vinnu?

„Með þeim þétta og góða hópi sem vinnur með mér hjá SVÞ tekst okkur að skipuleggja hverja viku í sameiningu á reglulegum starfsmannafundum okkar. Í hagsmunagæslunni liggur það oftast fyrir í upphafi hverrar viku hver helstu verkefnin eru sem liggja fyrir, hvaða umsögnum þarf að skila, hvaða fundir eru framundan og svo framvegis. 

Þannig að skipulagning vinnuvikunnar er oftast fremur auðveld, þó alltaf geti komið upp tilvik sem raska öllum plönum.“

Hvenær ferðu að sofa á kvöldin?

Það fylgir því víst að vera morgunhani að vera líka kvöldsvæfur. 

Um klukkan hálf ellefu er það koddinn og dúnsængin sem eru mínir bestu vinir.“