„Vorum kannski bara búnir að of­hugsa þennan leik“

„Þetta var nokkurn veginn eign Njarðvíkur. Mér fannst við koma ágætlega til baka í þriðja en þeir skora síðustu fimm stigin í þriðja og það var kannski svolítið dýrt og svo byrja fjórða svolítið vel þannig það kom í veg fyrir að við gætum komið til baka,“ sagði Lárus Jónsson þjálfari Þórs Þ. eftir leikinn í kvöld.

„Ég var ánægður með seinni hálfleikinn hjá strákunum. Það var allt annað að sjá þá. Þá voru menn hættir að hika og miklu meiri ákefð. Fyrri hálfleikur arfa slakur og seinni hálfleikur góður.“

Það virtist alltaf vera þannig að um leið og Þór Þ. gerðu sig líklega til að komast á áhlaup náðu Njarðvíkingar alltaf að skemma fyrir þeim mómentið.

„Já þeir settu bara stór skot þegar mómentið var með okkur. Það er ekkert flóknara heldur en það. Þeir eru bara með gott lið. Það var líka smá kafli þarna sem að við held ég klúðrum þremur sniðskotum í röð og þeir settu tvo þrista og eitt ‘and one’ og það svolítið drap leikinn og þá fór vindurinn svolítið úr okkur.“

Lárus talaði um að hann var ánægður með seinni hálfleikinn en hvað sagði hann við strákana í hálfleik til þess að hrista af þeim skrekkinn?

„Við ætluðum bara að sýna hvað í okkur býr í rauninni. Við skildum allt eftir á vellinum. Í fyrri hálfleik fannst mér við ekki gera það, við vorum á eftir Njarðvík í öllu sem að var að gerast á vellinum og vorum kannski bara búnir að ofhugsa þennan leik og strákarnir voru miklu betri í seinni hálfleik þegar þeir hættu að hugsa of mikið.“

Hverju má búast við frá Þór Þ. í leik tvö á sunnudaginn?

„Vonandi bara áframhald af seinni hálfleik.“