Vegir eru víða enn lokaðir og segir Vegagerðin að þótt mokstur sé hafinn víðast hvar gæti tekið nokkurn tíma að opna fyrir umferð.
Vegagerðin ítrekar einnig að vegfarendur virði lokanir því annað gæti leitt til þess að tafir verði á opnun. Af helstu vegum má nefna að lokað er á Holtavörðuheiðinni. Þar er mokstur hafinn en gæti tekið nokkurn tíma.
Fróðarheiðin er einnig lokuð og sömu sögu er að segja af Þröskuldum, Dynjandisheiði, Öxnadalsheiði og Siglufjarðarvegi. Þá einnig lokað um Fjarðarheiði eins og oft undanfarið. Þar er mokstur einnig hafinn en varað við því að tíma gæti tekið að opna að nýju.
Vonskuveður með mikilli snjókomu gengur yfir Austfirði og Norðurland en víða hefur snjóað og verið mjög hvasst um vestanvert landið. Vegir eru lokaðir um allt land og sums staðar væntir ekki fregna fyrr en á morgun.
Vegurinn um Öxnadalsheiði er enn lokaður en hleypt verður á umferð upp úr klukkan 09:00. Möguleiki er á að fylgdarakstur verði til að byrja með.
