Stjarnan er töl­­fræði­­lega besta lið sögunnar sem komst ekki í úr­slita­keppni

Þrjú lið enduðu jöfn með ellefu sigra og ellefu töp en Stjarnan kom verst út í innbyrðis leikjum þessara þriggja liða.

Stjarnan vann Blika og þurfti að treysta á það að Höttur myndi vinna nágranna þeirra á Álftanesi. Álftnesingar tryggðu sér hins vegar sjötta sætið með sigri og Hattarmenn enduðu með jafnmörg stig og Tindastóll og Stjarnan.

Það þýddi að Hattarmenn duttu niður um eitt sæti í áttunda sæti en jafnframt hoppuðu Íslandsmeistarar Tindastóls upp um tvö sæti og í sjöunda sætið.

Það sem fór með Stjörnuna var sautján stiga tap liðsins á Egilsstöðum í nóvember þar sem liðið skoraði aðeins 72 stig í leiknum. Stjarnan vann seinni leikinn en bara með tíu stigum. Þessi mismunur réði því að Garðabæjarliðið er ekki með í úrslitakeppninni í fyrsta sinn í sextán ár.

Stjarnan er því fyrsta félagið til að vinna ellefu leikju í 22 leikja deild og komast ekki í úrslitakeppnina. Þeir bættu með þessu met Njarðvíkinga frá 2017 sem unnu tíu leiki en sátu samt eftir með sárt ennið.