KEA eignast Ferro Zink hf. að fullu

Í tilkynningu kemur fram að KEA hafi fyrst eignast hlut í félaginu árið 2006 og hafi frá þeim tíma bætt við eignarhlut sinn. 

Þá segir að Jón Dan hafi fylgt félaginu í yfir hálfa öld, fyrst sem starfsmaður, síðar framkvæmdastjóri og eigandi og svo í seinni tíð sem móteigandi KEA í félaginu og stjórnarmaður. 

Starfsemi Ferro Zink hf. er á sviði stálsölu, smiðju, málmhúðunar og verslunarrekstrar og var velta síðasta árs tæpir þrír milljarðar króna og starfsfólk um sextíu talsins, að því er segir í tilkynningu.

Haft er eftir Halldóri Jóhannssyni, framkvæmdastjóra KEA, að fjölbreytt verkefni og viðfangsefni liggi fyrir hjá félaginu og margt áhugavert sé að gerast í umhverfi þess á næstu misserum. „Það þarf að taka stefnumarkandi ákvarðanir um framtíðarskipulag félagsins. Þessi fjárfesting er hluti af þeim áherslum sem við vinnum að núna sem felast í því að fækka verkefnum en um leið að stækka í þeim fjárfestingum sem KEA kemur að“ segir Halldór.

Þá er haft eftir Jóni Dan Jóhannssyni að nú sé komið að tímamótum hvað aðkomu hans að félaginu verði en hún spannar yfir 61 ár. „Þetta fyrirtæki var stofnað af föður og föðurbróður mínum og hóf það starfsemi árið 1960. Ég varð framkvæmdastjóri þess og einn eigenda árið 1989. Ég kveð félagið með söknuði og óska því, starfsfólki þess og eiganda alls hins besta“.