Sam­fé­lags­miðla­stjörnur og skák­goð­sagnir á Reykja­víkur­skák­mótinu

Tefldar verða níu umferðir á sjö dögum dagana 15. - 21. mars. Stigahæsti keppandi mótsins er rúmenska ungmennið Bogdan-Daniel Deac, sem er 22 ára með 2690 ELO stig. Úkraínska skákgoðsögnin Vasyl Ivanchuk er einnig meðal keppanda og er sennilega þekktastur þátttakenda. Frægt er viðtal þar sem Ivanchuk þuldi upp svo gott sem alla mögulega leiki og útkomur í nýafstaðinni skák sinni við Lei Tingjie.

Skákkonur láta að sér kveða

Enginn skortur verður á sterkum skákkonum.  Jiner Zhu (2467 ELO) verður stigahæst kvenna á mótinu og jafnframt sú eina sem er stórmeistari í opnum flokki. Aðrar þekktar skákkonur verða til dæmis hin indverska Tania Sachdev, og hin búlgarska Nurguyl Salimova sem er eitt heitasta nafnið í kvennaskákinni þessi misserin. 

Sterkir íslenskir þátttakendur

Stigahæstur íslenskra keppenda er Hjörvar Steinn Grétarsson stórmeistari (2530 ELO), sá 14. stigahæsti á mótinu. Aðrir íslenskir stórmeistarar á mótinu eru Hannes Hlífar Stefánsson, Héðinn Steingrímsson, Guðmundur Kjartansson, Vignir Vatnar Stefánsson, Jóhann Hjartarson, Bragi Þorfinsson og Þröstur Þórhallsson. Lenka Ptácníková margfaldur Íslandsmeistari kvenna tekur þátt, sem og Olga Prudnykova flóttamaður frá Úkraínu og nýkrýndur Íslandsmeistari kvenna.

Enskt undrabarn tekur þátt

Átta ára stúlka að nafni Bodhana Sivanandan (2088 ELO), sem er að margra mati eitt mesta efni sem skákheimar hafa séð, er einnig skráð til leiks. Lesa má um afrek hennar til dæmis í þessari frétt Guardian.

Skákáhrifavaldar í Hörpu

Einnig á meðal keppenda eru systurnar Alexandra og Andrea Botez, sem standa fyrir vinsælli rás á Youtube með næstum eina og hálfa milljón áskrifenda. Á þeirri rás má finna ýmiss konar myndbönd sem öll snúa að skák með einhverjum hætti. Þær njóta einnig mikils fylgis á Instagram með samanlagðan fylgjendafjölda upp á næstum eina og hálfa milljón. 

Skákmenn verða stjörnur á Youtube

Færst hefur í aukana síðustu ár að skákmenn séu virkir á samfélagsmiðlum, svo mikið að suma væri jafnvel hægt að kalla skákáhrifavalda.  Vinsæl iðja skákáhugamanna er að fylgjast með öðrum skákmönnum tefla í gegnum streymissíður eins og til dæmis Twitch. Þá hefur fjöldinn allur af skákmönnum sinnt myndbandagerð á Youtube af miklu kappi og borið af því góðan ávöxt. Í því tilliti má nefna til dæmis skákofurstjörnuna Hikaru Nakamura og Levy Rozman sem heldur úti rásinni GothamChess, sem er eftir bestu vitund blaðamanns vinsælasta skákrásin á youtube með hátt í fimm milljón áskrifendur.

Reykjavíkurskákmótið hefst föstudaginn 15. mars kl 15:00, og stendur yfir í sjö daga.