Einn helsti mannréttindafrömuður Rúss­lands dæmdur í fangelsi

Orlov var einn af æðstu forsvarsmönnum samtakanna Memorial sem stofnuð voru á níunda áratug síðustu aldar. Samtökin héldu utan um og skrásettu pólitíska kúgun í Sovétríkjunum og voru leiðandi í mannréttindabaráttu í Rússlandi.

Memorial hlutu friðarverðlaun Nóbels árið 2022.

Forsvarsmönnum samtakanna var gert að slíta rekstri þeirra árið 2021 af Hæstarétti Rússlands en dómarar byggðu ákvörðun sína á umdeildum lögum sem hafa ítrekað verið notuð gegn mannréttinda- og félagasamtökum í Rússlandi, auk sjálfstæðum fjölmiðlum, á undanförnum árum.

Sjá einnig: Hæstiréttur Rússlands gerir elstu mannréttindasamtökunum að hætta starfsemi

Orlov brosti til stuðningsmanna sinna í dómshúsinu í Moskvu þegar hann var leiddur úr dómsal í járnum í dag.

Orlov skrifaði árið 2022 grein með titilinum „Þeir vildu fasisma. Þeir fengu hann.“ Í þeirri grein gagnrýndi hann Vladimír Pútín, forseta Rússlands, og rússneskuþjóðina vegna innrásarinnar í Úkraínu og ódæða sem rússneskir hermenn hefðu framið þar. Þá sagði hann fólkið hafa valdið framtíð Rússlands miklum skaða.

„Þjóðin sem losaði sig við kommúnískt alræði fyrir þrjátíu árum er aftur fallin í skugga alræðis, en nú er það í formi fasisma,“ skrifaði Orlov.

Samkvæmt frétt New York Times var hann dæmdur til að greiða sekt vegna greinarinnar en málið var tekið upp aftur að kröfu saksóknara, sem sökuðu Orlov um hatur í garð hermanna. Fóru þeir fram á þriggja ára fangelsisdóm en eins og áður segir var Orlov dæmdur til tveggja og hálfs árs fangelsisvistar.

Í dómsal sagðist Orlov saklaust og lýsti því yfir að ákærurnar gegn honum væru þvættingur. Hann sagðist í raun ekki átta sig ásökunum gegn sér og sagði dómstólinn ekki hafa getað útskýrt almennilega nákvæmlega hvað hann væri sakaður um, þrátt fyrir að hann hefði ítrekað krafist þess.

74 ára kona sektuð vegna blóma

Á undanförnum árum og sérstaklega eftir að innrásin í Úkraínu hófst hefur rússneska ríkið gengið hart fram gegn allskonar andófi. Mannréttinda-, félaga- og hjálparsamtökum hefur verið gert að hætta starfsemi og á það sama við fjölmarga fjölmiðla.

Þá hafa mótmæli verið barin niður af mikilli hörku.

Sjá einnig: Öðrum mannréttindasamtökum gert að hætta í Rússlandi

Samtökin OVD-Info, sem eru sjálfstæð mannréttindasamtök sem vakta mótmæli í Rússlandi, sögðu frá því í dag að 74 ára gömul kona í Yekaterinburg hefði verið sektuð fyrir að leggja blóm á minnisvarða í minningu Alexei Navalní.

Þá var lögmaðurinn sem aðstoðaði móður Navalní við að fá lík hans afhent handtekinn í dag og mun hann hafa verið sakaður um ólöglegt framferði, samkvæmt fjölmiðlum eystra.