Vinna hafin við göngu- og hjólabrú yfir Elliða­ár

Vegagerðin skrifaði undir 6,8 milljarða króna verksamning um Arnarnesveg í lok júlímánaðar síðastliðið sumar og hófu verktakarnir framkvæmdir um miðjan ágúst. Vinna við göngu- og hjólabrúna hófst þó ekki fyrr en núna í febrúar.

Að sögn Unnþórs Helgasonar, verkstjóra hjá Loftorku, er gert ráð fyrir að ljúka stígagerð að brúarstæðinu og steypa upp brúarstöpla fyrir 1. maí í vor. Þá verður hlé gert á framkvæmdum vegna laxveiði í ánni en verkinu fram haldið eftir 15. október. Stefnt er að því að ljúka brúarsmíðinni og opna brúna á næsta ári.

Hún leysir af eldri göngubrú skammt frá sem þykir barn síns tíma. Í lýsingu Vegagerðarinnar segir að hún sé gömul lagnabrú fyrir vatns- og hitaveitu. Sitt hvoru megin við hana þurfi að ganga upp þröngar og nokkuð brattar tröppur sem reynst hafi mörgum farartálmi. Yfir vetrartímann hafi fólk átt í erfiðleikum með að fara um brúna, ekki síst með vagna, kerrur eða hjól og því löngu tímabært að byggja nýja brú sem standist nútímakröfur.

Nýja brúin verður lágreist timburbrú með aðskildum stígum fyrir gangandi og hjólandi vegfarendur. Segir Vegagerðin tekið mið af viðkvæmri staðsetningu yfir Elliðaárnar og sérstaklega hugað að því að brúin falli vel inn í landslagið. Hún verði mikil samgöngubót fyrir gangandi og hjólandi vegfarendur.

Brúin verður 46 metra löng, með 32 metra hafi yfir ána, og 5,7 metra breið. Þar af verða 2,5 metrar fyrir gangandi vegfarendur og 3 metrar fyrir hjólandi. Brúin verður fær snjóruðningstækjum og þjónustubílum vegna viðhalds og snjóruðnings.

Tré verður aðalbyggingarefni sem þýðir að brúin verður létt með lítilli eiginþyngd. Brúargólfið mun samanstanda af þverspenntri límtrésplötu, 225 millimetra þykkri. Timburbrúardekk verður með rakavarnarlagi sem hæfir timburbrú og malbiki. Handrið á brúnni verða úr málmi, 1,4 metra há með lóðréttum rimlum. Brúin er hönnuð fyrir 100 ára líftíma með hæfilegu viðhaldi.

Úti Inni Arkitektar og Verkís verkfræðistofa hönnuðu brúna í samstarfi við Vegagerðina og Reykjavíkurborg. Arkitekt brúarinnar er Baldur Ólafur Svavarsson hjá Úti Inni Arkitektum.

Myndband sem Verkfræðistofan Verkís gerði fyrir Vegagerðina sýnir hvernig Arnarnesvegur um Vatnsendahæð milli Rjúpnavegar og Breiðholtsbrautar mun líta út. Gerð Arnarnesvegar skal að fullu lokið sumarið 2026.