Fjölgun í hópi ís­lensku sjálf­boða­liðana í Egypta­landi

„Ég og Sigrún komum til Egyptalands á föstudaginn, föstudagskvöldið og hittum Maríu Lilju hér. Hún fór síðan til Ítalíu í gær og svo hefur aðeins fjölgað í hópnum úti af Íslendingum,“ segir Sema Erla Serdaroglu, stofnandi Solaris, og að þau séu í heildina fimm.

„Við erum ítrekað að vinna í því að koma fleirum út. Þetta er allt mjög krefjandi og tekur tíma og er fyrst og fremst átakanlegt. Við bindum miklar vonir við því að við náum að stíga fleiri skref í dag og koma fleirum í þann farveg að komast yfir landamærin,“ segir Sema Erla aðspurð um það hvernig gangi að koma fólki yfir landamærin.

Eftir að fólkið er komið yfir landamærin fylgja þau þeim á skrifstofu Alþjóðafólksflutningastofnunarinnar sem sér svo um að fylgja þeim til Íslands samkvæmt samningi sem stofnunin er með við íslensk yfirvöld.

„Þegar fólk er komið yfir landamærin höfum við verið að fylgja þeim til IOM til að koma málunum þar í ferli. Það tekur líka nokkra daga og er til dæmis í vinnslu með eina fjölskyldu,“ segir Sema Erla.

Ekkert heyrt í diplómötunum

Þrír fulltrúar á vegum utanríkisráðuneytisins héldu út til Egyptalands um helgina til að eiga fund með fulltrúum egypskra stjórnvalda. Sema hefur ekki hitt þá enn.

„Við höfum ekki hitt þá, ekki heyrt frá þeim. Við höfum ekki heyrt af þeim og íslensk stjórnvöld svara því ekki þegar við reynum að ná sambandi við þau,“ segir Sema Erla og að hún myndi gjarnan vilja komast í samband við þau.

„Því við viljum fá staðfestingu á því að þau séu hingað komin til þess að sækja fólkið okkar til Gasa og koma þeim til Íslands. Að þau séu í raun bara vinna vinnuna sína svo við getum kannski farið að einbeita okkur að öðru.“

Hafa safnað um 25 milljónum

Solaris – hjálparsamtök fyrir hælisleitendur og flóttafólk á Íslandi hefur staðið fyrir söfnun síðustu daga til að aðstoða við aðgerðir sjálfboðaliðanna í Egyptalandi til að koma fólkinu út Stefnan var sett á það að safna um 50 milljónum og segir Sema Erla söfnunina hafa gengið afar vel.

„Hún hefur gengið mjög vel. Síðast þegar ég vissi vorum við búin að ná um það bil helming af því sem við stefndum á. Við erum hér vegna þess að fólk hefur styrkt þessa söfnun og þetta framtak að koma fólkinu okkar frá Gasa og yfir til Íslands. Við vildum fara strax af stað að koma þessum málum áfram.“

Sema Erla segir að svo lengi sem þörf sé á verði þau áfram í Egyptalandi.

„Við erum í kappi við tímann. Tíminn er að renna frá okkur og allir eru mjög áhyggjufullir yfir því í hvað stefnir. Þess vegna vonum við að þetta sé ekki einhver sýndarmennska í því að að sé verið að senda diplómata hingað. Heldur að þau séu hingað komin til að koma fólkinu okkar út af Gasa.“

Sema Erla segir að í Egyptalandi séu fjölmargir aðrir í sömu erindagjörðum og þær. Langflestir séu að gera það í gegnum diplómatískar leiðir en vinni með sömu þjónustuaðilum og sjálfboðaliðarnir úti. Hún segir fólk reglulega komast yfir með þessum hætti.

Halda áfram þar til allir eru komnir út

„Við munum halda þessu verkefni áfram þar til við náum okkar markmiði, og það er að koma öllum þessum einstaklingum út af Gasa. Ég veit ekki hvað við nákvæmlega verðum lengi en við erum hópur af fólki að vinna þetta saman og munum halda áfram að skipta því með okkur. Við verðum að klára þetta sem fyrst vegna þess að það eru yfirstandandi árásir og við höfum áhyggjur af tímanum. Markmiðið er að koma öllum út og við erum hér til þess að ná þessu markmiði,“ segir Sema Erla og heldur áfram:

„Stjórnvöld verða að hysja upp um sig buxurnar, hætta þessari sýndarmennsku og ganga í verkið. Við erum hér að vinna vinnu stjórnvalda í sjálfboðavinnu og það er óásættanlegt. Ég vil sjá að þau gangi í verkið strax.“

Ísraelsher frelsaði tvo gísla úr haldi Hamas í kjölfar loftárása sinna í nótt. Í yfirlýsingu frá heilbrigðisráðuneytinu á Gasa, sem stjórnað er af Hamas hryðjuverkasamtökunum, kemur fram að 67 Palestínumenn voru drepnir í loftárásunum. Ein og hálf milljón Palestínumanna hefur leitað skjóls við Rafah síðustu mánuði.

Stjórnvöld á Gasa segja að nú hafi rúmlega 28 þúsund Palestínumenn verið drepnir síðan Ísraelar hófu árásir sínar á Gasa og tæplega 68 þúsund hafa særst.