Valur og Þór unnu örugga útisigra

Valskonur sóttu Fjölni heim og þrátt fyrir að vera fjórum stigum undir að loknum fyrsta leikhluta leiddu gestirnir með fimm stigum þegar flautað var til hálfleiks, staðan 33-38.

Valsliðið steig svo bensínið í botn í síðari hálfleik og skoraði 25 stig gegn 11 stigum Fjölnis í þriðja leikhluta. Það sama var uppi á teningnum í lokaleikhlutanum og Valskonur unnu að lokum öruggan 33 stiga sigur, 54-87.

Dagbjört Dögg Karlsdóttir og Brooklyn Pannell drógu vagninn í liði Vals og skoruðu 24 stig hvor. Í liði Fjölnis var Raquel Laneiro atkvæðamest með 20 stig.

Þá vann Þór Akureyri afar öruggan 23 stiga útisigur gegn Snæfelli, 53-76. Gestirnir frá Akureyri leiddu með 11 stigum í hálfleik, en stungu svo endanlega af í þriðja leikhluta þar sem liðið skoraði 28 stig gegn átta stigum heimakvenna. Heimakonur klóruðu örlítið í bakkann í fjórða leikhluta, en þá voru úrslitin þegar ráðin.