Hættu­stig fært niður á öllum svæðum

Heildarhættumat fyrir Grindavík, er komið niður á rautt, sem þýðir mikil hætta, en var áður fjólublátt. Hættan sem er nú í bænum stafar af sprungum, sprunguhreyfingum og hraunflæði.

Í Svartsengi er hættumat fært úr appelsínugult yfir í gult, sem þýðir nokkur hætta.

Samkvæmt uppfærslu á vef Veðurstofunnar segir að áfram sjáist skýr merki um landris við Svartsengi, en að of snemmt sé að fullyrða um hvort hraðinn á landrisinu sé meiri en hann var fyrir gosið 14. janúar.

„Allra fyrstu mælingar benda til þess að svo sé, en eins og áður hefur komið fram getur verið dagamunur á milli mælinga sem ekki endilega segja til um þróun á landrisinu til langs tíma.“

Þá segir að áfram dragi úr skjálftavirkni yfir kvikuganginum og hægt hafi verulega á þeim breytingum sem áður sáust á GPS mælum. „Því eru allar líkur til þess að kvika flæði ekki lengur inn í kvikuganginn sem myndaðist 14. janúar og eldgosinu sé lokið,“ segir í tilkynningunni.

„Áfram er þó metin mikil hætta á því að jarðvegur hrynji ofan í sprungur sem eru innan bæjarmarkanna og mikilvægt að nýjar sprungur verði kortlagðar og breytingar á þekktum sprungum metnar.“