Pallíettur og jólakokteilar í hádeginu hjá flugfreyjum Icelandair

Svava Marín Óskarsdóttir skrifar 11. desember 2023 18:01

Vinkonurnar og flugfreyjurnar TF-stuð hittust prúðbúnar í hádeginu klæddar pallíettum og skáluðu fyrir jólahátíðinni.

Gígja Sigríður Guðjónsdóttir, flugfreyja og matarbloggari, bauð vinkonum sínum og samstarfskonum hjá Icelandair í ljúffengan jólabrunch að heimili sínu í Keflavík á dögunum. Pallíettur, jólakokteilar og hláturssköll einkenndu jólagleðina.

„TF er skráningarnúmer íslenskra flugvéla, og köllum við okkur því TF-stuð áhöfnina,“ segir Gígja og hlær.

Hópurinn samanstendur af þeim Gígju Sigríði Guðjónsdóttur, Ingunni Köru Gunnarsdóttur, Ernu Viktoríu Jansdóttur, Rakel Ásgeirsdóttur og Guðbjörgu Láru Rúnarsdóttur. Allar starfar þær sem flugfreyjur hjá Icelandair.

Óhætt er að vinkonurnar skemmtu sér vel saman.Aðsend

„Við hittumst í hádeginu á þriðjudegi þar sem við eigum ekki möguleika að hittast um helgar út af fluginu. Þetta var í fyrsta sinn sem við héldum jólabröns en vorum sammála um þetta er hefð sem er komin til að vera,“ segir Gígja.

Gígja starfar einnig sem varafulltrúi Sjálfstæðisflokksins í Reykjanesbæ.Aðsend

Gígja þykir með eindæmum smekkleg þegar kemur að matseld og framsetningu. Hátíðlegt jólaborðið var dekkað með matarstelli frá Royal Copenhagen, hvítum dúk og greni. Þá má segja að maturinn væri sjálfur algjört listaverk.

„Ég bauð upp á alls kyns jólasnittur, lax, flatkökur með hangikjöti, hamborgarhrygg, jólaköku, salat, og annað jólalegt,“ segir Gígja.