Helmingi sagt upp hjá KOM og tveir eig­endur keyptir út

Þetta staðfestir Björgvin Guðmundsson, framkvæmdastjóri og einn þriggja eigenda KOM, í samtali við Vísi. Hann segir rekstraraðstæður fyrirtækisins, eins og annarra fyrirtækja, hafa verið erfiðar undanfarin misseri og nauðsynlegt hafi verið að ráðast í breytingar.

Hann hafi komið aftur inn í daglegan rekstur fyrirtækisins í september síðastliðnum og tekið við stöðu framkvæmdastjóra, eftir að hafa unnið í þrjú ár hjá frumkvöðlafyrirtæki í tæknigeiranum hér á landi.

Dregur úr umsvifum í bili

Björgvin segir að uppsagnirnar séu hluti af gagngerri endurskipulagningu sem hann hafi talið nauðsynlegt að ráðast í vegna áskorana í rekstri. Til standi að draga úr umsvifum í bili, á meðan fyrirtækið er endurskipulagt, en að verkefnastaða sé samt sem áður góð.

„Verkefnastaðan er góð en við þurfum að mæta þeim áskorunum sem við stöndum frammi fyrir. Ég hef fulla trú á því að við munum eflast og byggja á þeim góða grunni sem við höfum byggt á hingað til.“

Sem áður segir er KOM elsta ráðgjafarfyrirtæki landsins á sviði almannatengsla. Það hét áður Kynning og markaður og var stofnað árið 1986 af Jóni Hákoni Magnússyni í kjölfar leiðtogafundar Gorbatsjovs og Reagans í Höfða.

Björgvin segir að eftir sem áður muni KOM samanstanda af þremur stoðum. KOM ráðgjöf, KOMUM, sem sér um funda- og ráðstefnuhald og rekið er í sérfélagi með tvo starfsmenn til viðbótar við þá fjóra sem starfa hjá KOM, og KOM hönnun, sem hannar vörumerki og ásýnd fyrir fyrirtæki. Þá bætist við nýsköpunarstarfsemi, sem muni koma að þróun rafrænna lausna fyrir viðskiptavini. Það sé hugmynd sem hann fékk á meðan hann starfaði í tæknigeiranum og muni fylgja eftir núna.

Ætlar að kaupa út borgarfulltrúa og framkvæmdastjóra miðla

Auk Björgvins eiga Friðjón Friðjónsson, borgarfulltrúi og varaþingmaður Sjálfstæðisflokksins, og Magnús Ragnarsson, framkvæmdastjóri miðla Símans, hver sinn þriðjung af KOM ráðgjöf - Kynning og ehf.. Björgvin segir að til standi að hann kaupi þá Friðjón og Magnús út úr félaginu. Viðskiptin séu ekki frágengin en þau hafi þegar verið samþykkt.