Öng­þveiti þegar nýjar snyrti­vörur fóru í sölu í Krónunni

Guðrún Aðalsteinsdóttir, framkvæmdastjóri Krónunnar, segir í samtali við Vísi að starfsfólk hafi átt von á miklum fjölda í versluninni en ekkert í líkingu við þetta. 

Kalla hafi þurft út auka mannskap um stund. Vörurnar hafi rokið út á mettíma. Síðan hafi lítill tími gefist til þess að taka upp úr kössum þegar komið var með nýjar vörur, svo mikið lá viðskiptavinum á að næla sér í vörur.

e.l.f. Cosmetics snyrtivörurnar hafa notið mikilla vinsælda á samfélagsmiðlum. Sérstaklega á Tik-Tok og minna vinsældir snyrtivaranna í Krónunni nú á það þegar Prime orkudrykkurinn fór fyrst í sölu í versluninni fyrir ári síðan. Þá myndaðist öngþveiti í versluninni.

Guðrún segir að einhverjar vörur hafi selst upp úr smiðju e.l.f. Um fimm til sex þúsund vörur hafi selst á föstudaginn. Nóg hafi hins vegar verið pantað í flestum flokkum og því sé enn eitthvað eftir.

Hún segir að von sé á annarri sendingu fyrir jól. Þá verða vörur frá snyrtivöruframleiðandanum einnig í boði í verslun Krónunnar Á Akureyri sem opna á miðvikudaginn.