Sex höggum frá Evrópumótaröðinni fyrir lokadaginn

Hjörtur Leó Guðjónsson skrifar 15. nóvember 2023 06:21

Haraldur Franklín Magnús þarf að sýna sínar bestu hliðar í dag. Octavio Passos/Getty Images

Kylfingurinn Haraldur Franklín Magnús komst í gegnum niðurskurðinn á lokaúrtökumótinu fyrir Evrópumótaröðina, DP World Tour í karlaflokki síðastliðinn mánudag. Lokadagur úrtökumótsins fer fram í dag og á Haraldur enn möguleika þó vonin sé veik.

Haraldur situr ásamt fjórum öðrum kylfingum í 66. sæti úrtökumótsins. Aðeins þeir sem enda í efstu 25 sætunum í úrtökumótinu vinna sér inn þáttökurétt á Evrópumótaröðinni, en séu fleiri en einn kylfingur jafnir í 25. sæti fá þeir allir sæti á mótaröðinni.

Haraldur á því enn nokkuð langt í land til að vinna sér inn þátttökurétt á Evrópumótaröðinni. Hann lék hring gærdagsins á 71 höggi, eða á pari, og er því samtals á sex höggum undir pari fyrir sjötta og seinasta hringinn.

Eins og staðan er þegar þetta er ritað eru sjö kylfingar jafnir í 24. sæti á tólf höggum undir pari og því þarf allt að ganga upp hjá Haraldi í dag ætli hann sér að vinna sér inn þátttökurétt.

Haraldur hefur sýnt það í úrtökumótinu að hann getur unnið upp slíkt forskot, en hann lék fyrsta hringinn á 66 höggum. Hann þarf þó að sýna sínar bestu hliðar í dag og vona að aðrir kylfingar eigi kannski ekki sinn besta dag á sama tíma.

Golf