Þriðja vaktin er til og Jóhannes Haukur gengur hana

Mikið hefur verið skrafað um þriðju vaktina svokölluðu en hjónin, sálfræðingurinn Hulda Tölgyes og kynjafræðingurinn Þorsteinn V. Einarsson, hafa ritað bók um hana og vonast til að selja þá hana í stórum stíl. Hugtakið þriðja vaktin gengur út á að konur gangi þessa þriðju vakt, þær séu undir miklu álagi vegna hennar. En á móti eru svo ýmsir sem hafna þessu hugtaki. Segja það teygjanlegt og loðið og samkomulagsatriði sé hvernig skipulagi hvers heimilis um sig sé háttað.

Nú hefur Jóhannes Haukur stigið fram og hann hefur fyrir sína parta kveðið uppúr um að þessi þriðja vakt sé til. „En það er ÉG SEM ER Á HENNI! Alla daga.“

En það er ekki svo að Jóhannes Haukur sé að kvarta undan, hann er bara að benda á þetta. „En svo það sé tekið fram, þá munar mig ekkert um það. Allt fyrir hana Rósu mína.“

Og máli sínu til sönnunar birtir hann skilaboð í stórum stíl frá Rósu Björk Sveinsdóttur eiginkonu sinni þar sem hann er spurður um allt milli himins og jarðar. Og Jóhannes Haukur er með svörin á reiðum höndum. Hér eru nokkur dæmi:

„Rósa: Veistu um bólusetningarskírteinið hennar Ólafar?

Jóhannes Haukur: Já, ég held það. Ég held að það sé í skápnum þar sem rafmagnstaflan er í búrinu. Ef ekki þar, þá uppi í litla skápnum sem er inní stærri skápnum í búrinu. Þar sem allskonar drasl er. Ryksugupokar, saumavélin og svo framvegis.“

…

„Rósa: Heyrðu hvað kostar tíminn hjá Hilmari?

Jóhannes Haukur: 14þ.“

…

„Rósa: Eigum við Covid próf?

Jóhannes Haukur: Já. Í hillunni niðri. Alveg svona pro dæmi.“

…

„Rósa: Hvenær koma frakkarnir?

Jóhannes Haukur: Vikunni fyrir páskavikuna. Koma 24. mars.“

…

Rósa: Hvar eru sundfötin hennar Mrgrétar?“

Jóhannes Haukur: Í Krúsernum. (Og hjartamerki með.)“

…

„Rósa: Heyrðu eru fimleikarnir búnir klukkan 12?

Jóhannes Haukur: Já.“

Og þannig ganga samskiptin fyrir sig á því heimilinu.