Enginn hafi sofið af sér erfiða og langa jarðskjálftahrinu

Jarðhræringarnar fóru misvel í íbúa í nótt og voru margir lúnir í dag.

„Ég er soldið þreytt en léttir að þetta err smá pása núna,“ sagði Ágústa og hélt áfram:

„Þetta er svo óþægilegt á nóttunni. Þá er maður ómögulegur. Getur ekki lengið í rúminu og það glamrar allt.“

Valgerður var ekki sammála og sagði skjálftana á fimmtudaginn verri. En að það hefði þó skipt máli að hún var vakandi í gær þegar hrinan hófst.

„Skárri heldur en aðfaranótt föstudags síðasta. Þá vaknaði ég við lætin en núna vissi ég að þetta var komið.“

Páll Valur Björnsson, íbúi og kennari í Grindavík, vaknaði við fyrsta skjálftann.

„Svo var maður bara ferðinni og náði ekkert að festa svefn. Ég held ég lýsi upplifun allra í bænum þegar ég segi að þetta var mjög erfitt. Þetta er óhugnanlegt á meðan á þessu varir.“

Hann segir hrinurnar koma í lotum og það sé alltaf jafn erfitt að upplifa svefnleysið og hvernig taugakerfið er þanið.

„Maður er bara þreyttur andlega,“ segir hann og að hans upplifun sé öðruvísi núna en áður. Skjálftarnir séu nær og alla skjálfta yfir tveimur finni þau vel.

„Maður verður óöruggari og ég viðurkenni það fúslega að manni er órótt.“

Yfirlýsingar stundum misvísandi

Hann segist treysta jarðvísindamönnum og sérfræðingum en að staðan sé einhvern veginn öðruvísi núna. Hann telur yfirlýsingar jarðvísindamanna stundum of glannalegar og að upplýsingar til íbúa hefðu mögulega mátt berast fyrr í síðustu viku.

Hann setti á Facebook í nótt færslu þar sem hann spurði hvort einhver vildi kaupa hús. Páll Valur segist hafa sett færsluna inn í gríni. Hann vilji aðeins búa í Grindavík en að þau hjónin hafi samt sem áður pakkað í tösku í gær.

„Við hjónin settum í töskur í gær. Svona aukafatnað og höfðum það út í bíl. Við eigum líka húsbíl og við fórum með hann austur í Árnessýslu og fáum að geyma hann þar á sveitabæ hjá kunningjafólki okkar. Við erum að gera ráðstafanir ef allt fer á versta veg, sem maður vonar sannarlega ekki. En maður veit aldrei.“

Hann segir þær sviðsmyndir sem búið er að teikna upp ekki spennandi.

„Ég tala nú ekki um ef þetta kemur upp í Svartsengi. Við erum svo ofboðslega háð öllu þar þegar kemur að vatni og rafmagni. Það gæti orðið erfitt að búa hérna þá.“

Nóttin ekki notaleg

Bæjarstjórinn tekur undir og segir nóttina hafa verið erfiða.

„Hún var ekki notaleg hérna fyrir okkur íbúa hérna í Grindavík. Þetta voru sterkir skjálftar og íbúarnir fundu vel fyrir henni. Ég held að enginn hafi getað sofið af sér þessa hrinu sem var í nótt,“ segir Fannar Jónasson, bæjarstjóri.

Bláa lóninu hefur nú verið lokað. Það mun standa autt í heila viku. Forsvarsmenn fyrirtækisins tóku þessa ákvörðun eftir stóra jarðskjálfthrinu í nótt. Fannar telur það hafa verið rétta ákvörðun.

„Það er óvissustig og með þessa atburði næturinnar held ég að það hafi verið alveg tímabært.“

Hann segir að bæjarstjórn sé í góðu sambandi við önnur fyrirtæki á svæðinu en Northern Lights Inn, hótel á svipuðum slóðum, var einnig lokað í dag. Þá segist hann einnig vera í góðu sambandi við yfirmenn í orkuverinu og þar sé stöðugt unnið að því að tryggja og varðveita innviði.

Hann segir bæjaryfirvöld í daglegu sambandi við HS Orku og HS Veitur, það sé búið að tryggja varaaflsstöðvar og að það sé verið að vinna að því að finna varaaflsleiðir fyrir vatnsbólið. Hann segir mikilvægt fyrir íbúa að gera ráðstafanir.

„Eins og að vera með nóg af vatni til drykkjar og mati með gott geymsluþol,“ segir Fannar en minnir þó á að svæðið sé ekki langt frá öðrum byggðum þar sem hægt sé að sækja vistir.

„Við þurfum ekki að búast við því að vera innlyksa hér en það er alveg rétt að hafa allan varann á og vera undirbúin.“

Spurður hvort hann telji tilefni til að fara á hættustig segir hann það verkefni annarra að meta það. Þau fylgi þeim fyrirmælum sem fylgi hverju stigi. Hann segir vöktun mjög góða og að fundað sé með viðbragðsaðilum oft á dag. Þá vinni bæjaryfirvöld að því að koma upp viðburðum þar sem íbúar fái góðar upplýsingar og geti hist og talað saman.