Haga­skóli og Lauga­lækjar­skóli í úr­slit Skrekks

Átta grunnskólar tóku þátt á fyrsta undanúrslitakvöldinu; það er Austurbæjarskóli, Álftamýrarskóli, Breiðholtsskóli, Hagaskóli, Klettaskóli, Laugalækjarskóli, Ingunnarskóli og Vogaskóli.

 Í úrslit komust Hagaskóli með atriðið Líttu upp, taktu eftir og Laugalækjaskóli með atriðið Dagurinn hennar mömmu. 244 ungmenni úr Reykjavík tóku þátt í atriðunum í kvöld.

Í heildina eru um sjö hundruð þátttakendur í Skrekk í ár en keppnin fer fram í Borgarleikhúsinu. 

Undankvöldin eru þrjú og fara hin tvö fram í kvöld og svo annað kvöld. Úrslitin ráðast svo mánudagskvöldið 13. nóvember.

Skrekkur er nú haldinn í 33. sinn en það var Réttarholtsskóli sem bar sigur úr býtum á síðasta ári.