Ronaldo bað um að dómara yrði skipt út af

Al-Nassr vann leikinn, 1-0, í sextán liða úrslitum sádiarabíska konungsbikarsins en Ronaldo var samt hinn ósáttasti á meðan honum stóð. Hann fékk til að mynda gult spjald í fyrri hálfleik fyrir mótmæli.

Í uppbótartíma fyrri hálfleiks skoraði Brasilíumaðurinn Talisca fyrir Al-Nassr. Markið var hins vegar dæmt af eftir skoðun á myndbandi þar sem Ronaldo var rangstæður.

Portúgalinn hafði lítinn húmor fyrir þessari ákvörðun, gaf merki um skiptingu og benti svo á dómarann, hinn síleska Piero Maza. 

Hann fékk ósk sína þó ekki uppfyllta og ekki kættist hann augnabliki síðar þegar Talisca var rekinn af velli fyrir olnbogaskot.

Jafnt varð í liðum á 89. mínútu þegar Ali Abdullah Hazzazi, leikmaður Al-Ettifaq, fékk rautt spjald. Bæði lið voru því með tíu leikmenn inn á í framlengingunni þar sem úrslit leiksins réðust.

Sadio Mané reyndist hetja Al-Nassr en hann skoraði eina mark leiksins á 107. mínútu og tryggði liðinu sæti í átta liða úrslitum konungsbikarsins.