Átrúnaðargoðin úr áttunni ætla að trylla lýðinn með Todmobile

Fréttamaður mælti sér mót í Hörpu með Þorvaldi Bjarna Þorvaldssyni gítarleikara Todmobile, Nik Kershaw og Tony Hadley, söngvara Spandau Ballet en Midge Ure söngvari Ultravox var þó fjarri góðu gamni í dag því hann hafði leigt sér bílaleigubíl og mátti engan tíma missa því hann þurfti að skoða íslenska náttúru.

Það fór vel á með tónlistarmönnunum og það var ekki að sjá á þeim neina þreytu eftir flugið því þeir göntuðust út í eitt og reittu hreinlega af sér brandarana. Þorvaldur Bjarni var í skýjunum að fá átrúnaðargoðin til Íslands.

„Við ætlum að halda partý og hvað er partý án gesta? Þannig að ég segi því fleiri því betra!“

Þetta er í fyrsta skiptið sem Tony Hadley heimsækir Ísland svo það var kominn tími til.

„Eftir 43 ár í bransanum eru þau ekki mörg löndin sem maður hefur ekki heimsótt. Þetta er í fyrsta sinn sem ég kem hingað. Eiginkona mín hefur þó komið hingað nokkrum sinnum og hún hefur sagt að landið væri eitt það fegursta sem hún hefði heimsótt og mér sýnist á öllu að hún hafi rétt fyrir sér. Landið er sláandi fallegt,“ sagði Hadley sem virti útsýnið úr Hörpu betur fyrir sér og bætti svo við að íslenskur matur ætti víst að vera frábær.

Nik Kershaw benti Hadley þá á að hann hefði heyrt það frá sér en Kershaw er mikill Íslandsvinur en þessi ferð er hans er sú fjórða í röðinni. „Ég hef farið tvisvar áður í vinnuferð hingað og svo einu sinni bara upp á gamanið.“

Þeir voru spurðir hverju gestir mættu búast við af tónleikunum og það stóð ekki á svörum því þeir hafa ekki í hyggju að spara nein tromp.

„Þeir fá að heyra smellina,“ sagði Kershaw og Hadlay sá sér leik á borði og þóttist slá til Kershaw til að sýna fram á margslungna merkingu enska orðsins „hit“ eða smellur og sá strax að sér og baðst svo afsökunar á slæmum brandara. Kershaw flissaði en hélt ótrauður áfram.

„Ég held þetta verði dálítið öðruvísi því við höfum ekki náð að æfa ennþá svo það verður mjög spennandi að sjá hvað úr verður. Við verðum með stórhljómsveit, rokksveit og við verðum með smellina og sama hvernig á það er litið þá verður þetta magnað.“

Hadley sagðist þá vera svo þakklátur fyrir að þeir væru þarna saman vinirnir á Íslandi, það væri ekki á hverjum degi sem gætu varið tíma saman. Þeir voru spurði hvort þeir væru nánir og jafnvel alltaf að dást hver að öðrum.

„Við eru alltaf að dást hver að öðrum, ekki satt Tony?“

„Jú, ég elska þig,“ skaut Hadley inn í. Kershaw útskýrði að þeir ættu svo margt sameiginlegt.

„Við höfum allir upplifað það sama. Við höfum verið samferða í bransanum og erum svo þakklátir fyrir að fá að vera enn að,“ sagði Kersaw og Hadlay kinkaði kolli og sagði að það væri tónlistin sem sameinaði þá alla og ástríðan fyrir henni.”

Það sást langar leiðir á Þorvaldi Bjarna hvað hann var stoltur að hafa fengið þessa listamenn til landsins og gera Íslendingum kleift að upplifa töfrana.

„Það er sögulegt að geta leitt þessi þrjú átrúnaðargoð saman með stórhljómsveitinni og Todmobile. Alveg frábært!“ sagði Þorvaldur Bjarni.

Fyrir þau sem hyggjast mæta á tónleikana er ekki úr leið að hita upp með þessum smellum sem gerðu allt vitlaust í áttunni. Hér eru frekari upplýsingar um tónleikana.