Grunaður um að reyna að drepa fyrr­verandi: „Ég skal bara klára þetta núna“

Þetta segir í úrskurði Landréttar, sem kveðinn var upp þann 13. september síðastliðinn en birtur nýverið. Þar var gæsluvarðhaldsúrskurður Héraðsdóms Reykjaness til 6. október yfir manninum staðfestur. Annar úrskurður hefur ekki verið birtur á vef dómstólanna en Grímur Grímsson, yfirlögregluþjónn miðlægrar rannsóknardeildar Lögreglunnar á höfuðborgarsvæðinu, segir í samtali við Vísi að héraðsdómur hafi framlengt gæsluvarðhald yfir manninum út þennan mánuð. Hann viti ekki til þess að það hafi verið kært til Landsréttar.

Að öðru leyti sé ekkert annað um málið að segja en það sem segir í úrskurðinum.  

Taldi atvikið sitt síðasta

Í skýrslu konunnar hjá lögreglu þann 25. ágúst síðastliðinn, daginn eftir árásina, sagði hún að maðurinn hefði sparkað að minnsta kosti þrisvar í höfuð hennar og haldið henni kyrkingartaki undir vatni.

Í skýrslu hennar 6. september kom meðal annars fram að hún teldi meðvitund sína hafa dottið inn og út, hún hafi óttast um líf sitt og talið að þetta yrði hennar síðasta.

Vitni kom konunni til bjargar

Í málinu liggur fyrir framburður manns sem segist hafa orðið vitni að árásinni. Hann hafi verið á gangi í skóglendi á höfuðborgarsvæðinu þegar hann varð var við átök. 

Hann hafi séð mann lemja konu og stappa ofan á höfði hennar. Maðurinn hefði síðan beygt sig niður að konunni, „byrjað að kyrkja hana“ og sagt „á ég ekki bara að svæfa þig, klára þetta núna“. Vitnið hafi þá kallað til þeirra og maðurinn litið á vitnið, staðið upp og hlaupið af vettvangi

Í skýrslu hjá lögreglu 26. ágúst lýsti vitnið því að það hefði heyrt öskur og séð konu liggjandi í grasinu og karlmann að yfirbuga hana. Maðurinn hefði sparkað og kýlt í konuna, mestmegnis í andlit hennar. Hann hefði verið að „að reyna að kála henni í andlitið“. Hann hefði síðan farið „að kyrkja hana“ og vitnið þá öskrað. 

Vitnið lýsti því nánar að maðurinn hefði farið aftan að konunni og ofan á hana þar sem hún hefði legið alveg varnarlaus og sagt „ég skal bara klára þetta núna, þetta verður bara búið“. Hann hefði „basically hótað henni lífláti“, verið mjög reiður, ógnandi og árásargjarn. Hún hefði verið að reyna að losna og öskrað á hjálp.

Hlaut lífshættulega áverka

Konan leitaði til bráðamóttöku eftir árásina. Í læknisvottorði sérfræðilæknis á slysa- og bráðadeild er útbreiddum áverkum konunnar lýst. 

Nánar tiltekið er þar lýst greiningu á nefbeinsbroti, andlitsbeinsbroti, opnum sárum á höfði, mörgum mar-og yfirborðsáverkum á höfði og mar- og yfirborðsáverkum á hálsi, framhandlegg, upphandlegg, fótleggjum og mjöðm. Í niðurlagi segir meðal annars: „Undirrituð telur að áverkar [konunnar] séu í samræmi við áverkasögu hennar um kyrkingu og mörg högg á höfuð. Alvarleg árás og áverkalýsing sem getur verið lífshættuleg.“

Með vísan til framangreinds féllst Landsréttur á það með Lögreglustjóranum á höfuðborgarsvæðinu að maðurinn væri grunaður um brot sem varðar tíu ára fangelsi og að ríkir almannahagsmunir stæðu til þess að hann gengi ekki laus.

Játaði að hafa reynt að komast undan handtöku

Í kjölfar skýrslutöku vitnisins þann 26. ágúst var lýst eftir manninum. Hann fannst ekki fyrr en 2. september og þegar lögregla fann hann reyndi hann að koma sér undan. Þegar lögregla hljóp hann uppi kvaðst hann hafa verið að forðast handtöku vegna þessa máls.

Við yfirheyrslu neitaði maðurinn sök en neitaði ekki að hafa verið á vettvangi árásarinnar. Hann sagðist hafa verið þar ásamt konunni og þriðja manni. Hann hefði svo farið heim til sín og teldi að konan hefði veitt sér áverkana sjálf eða þriðji maðurinn hefði gert það.

Lögregla hefur annað mál mannsins til rannsóknar en þar er hann grunaður um brot í nánu sambandi sínu við konuna, með því að hafa sparkað í höfuð hennar, hrint henni niður tröppur og tekið hana hálstaki með þeim afleiðingum að hún hlaut marbletti víðsvegar um líkamann og punktblæðingar á háls

Uppfært klukkan 10 eftir að upplýsingar um áframhaldandi gæsluvarðhald fengust.