Glaður að sjá Gylfa á nýjan leik: „Gott að sjá hann brosa“

„Ég er búinn að koma mér mjög vel fyrir og þetta hefur farið svona upp og ofan af stað. Við byrjuðum vel en svo er smá bras á okkur núna. En ég hef fulla trú á þessu verk­efni. Mér líður vel þarna. Þetta er frá­bært fé­lag með góðan þjálfara og leik­manna­hóp. Ég er mjög bjart­sýnn,“ sagði Guð­laugur Victor um tíma sinn til þessa hjá belgíska liðinu KAS Eupen og fram­haldið þar.

Guð­laugur Victor var áður á mála hjá D.C. United, liði Was­hington­borgar í Banda­ríkjunum og því voru við­brigðin mikil að skipta yfir til liðs í Belgíu.

„Mjög mikil. Að fara frá Was­hington D.C. og vera núna kominn út í sveit í Belgíu. En það er mjög fínt.“

Guð­laugur Victor er ekki eini Ís­lendingurinn á mála hjá KAS Eupen. Þar má einnig finna lands­liðs­fram­herjann Al­freð Finn­boga­son sem skipti yfir til Belgíu frá Ís­lendinga­liði Lyng­by í dönsku úr­vals­deildinni í síðasta leik­manna­glugga.

„Það er frá­bært að hafa Al­freð með sér í þessu. Frá­bært að hann skildi hafa komið. Við erum búnir að vera góðir vinir í mörg ár.“

Fram­undan eru tveir heima­leikir hjá ís­lenska lands­liðinu í undan­keppni EM 2024. Leikir gegn Lúxem­borg og Liechten­stein.

Leikurinn við Lúxem­borg kemur fyrst og eiga ís­lensku leik­mennirnir harma að hefna eftir 3-1 tap í fyrri leik liðanna. Guð­laugur Victor segir menn vilja svara fyrir þau úr­slit í komandi leik liðanna.

„Ég sagði það eftir leikinn og segi það bara enn og aftur að þessi leikur var eitt stór­slys. Við sýndum það strax í næsta leik, gegn Bosníu, með flottum úr­slitum og spila­mennsku.

Við þurfum að vinna þennan komandi leik gegn Lúxem­borg og þurfum að sýna öllum að þetta hafi bara verið slys.“

Það bárust stór­tíðindi úr her­búðum liðsins þegar leik­manna­hópurinn fyrir komandi verk­efni var opin­beraður. Gylfi Þór Sigurðs­son, einn besti fót­bolta­maður Ís­lands frá upp­hafi, snýr aftur í lands­liðið og gæti leikið sinn fyrsta lands­leik í tæp þrjú ár.

Guð­laugur Victor er á­nægður með að sjá Gylfa aftur í lands­liðinu, hann gefi liðinu mikið.

„Gylfi er náttúru­lega bara einn af okkar bestu mönnum. Það frá­bært fyrir hann og frá­bært fyrir okkur að hann sé kominn aftur. Gylfi gefur okkur ó­trú­lega mikið innan sem utan vallar. Það er gott að sjá hann inn á knatt­spyrnu­vellinum á nýjan leik. Það er gott að sjá hann brosa, gott að sjá hann í góðum gír.“