„Það þurfti að halda á mér út af vellinum“

Á hverju ári leitar fjöldi barna til lækna hér á landi eftir að hafa slasast eða meiðst við að stunda íþróttir. Erfitt er að finna nákvæmar tölur um fjölda íþróttaslysa á börnum. Þeir sem starfa á þessu sviði telja hins vegar að þeim fari fjölgandi. 

Á síðasta ári, voru samkvæmt tölum frá Sjúkratryggingum, gerðar um sjötíu krossbandaaðgerðir á börnum og ungmennum.  

Iðunn Þórey Hjaltalín er ein þeirra sem sagði sögu sína í þættinum Hliðarlínunni sem sýndur var á Stöð 2 og Stöð 2 Sport í gærkvöldi.

„Ég var bara að spila á æfingu og þá er ég að teygja mig í boltann með fætinum og þá heyri ég bara svona popp.“

Hægt er að sjá brot úr þættinum Hliðarlínan í spilaranum hér fyrir neðan. Þátturinn í heild er á Stöð 2+.

Iðunn sem var fjórtán ára þegar þetta gerðist segist strax hafa áttað sig á að meiðslin voru alvarleg. 

„Það þurfti að halda á mér út af vellinum og hann var svona fastur beygður og ég reyndi að rétta úr honum og þá hreyfðist svona hnéskelin aðeins. Ég var eiginlega viss um að ég hafði slitið eitthvað.“

Iðunn fór í krossbandaaðgerð og vonast til að geta farið aftur að æfa um áramótin.   

Einn þeirra sem gerir krossbandaaðgerðir á börnum er Haukur Björnsson bæklunarskurðlæknir. 

„Það virðist vera að fjölga þessum krossbandaslitum. Við sjáum krakka mjög reglulega. Niður í tíu ellefu ára krakka.“

Haukur segir það gerast stundum að sömu börnin komi aftur í aðgerð. 

„Það er töluverð hætta á að krakkar geti slitið aftur. Sérstaklega yngstu krakkarnir og það eru rannsóknir sem sýna að allt að tuttugu til þrjátíu prósent af krökkum sem slíta krossband slíta aftur. Þannig við erum mjög harðir í dag að fara ekki of snemma af stað.“ 

Gerðar eru tugir aðgerða á Landspítalanum á ári á börnum sem hlotið hafa og beinbrot og áverka á hné eftir íþróttir.

Hjörtur Hjartarson yfirlæknir bæklunarskurðlækninga á Landspítalanum segir töluvert meira um slys þegar verið sé að keppa í íþróttum en á æfingum. Hann segir í raun óhugnanlegt hversu algengt sé að börn slasist við íþróttaiðkun. 

„Ég hef ekki farið á fótboltamót án þess að verða sjálfur vitni að beinbroti. Ég nánast fullyrði það.“ 

Þá gerist það stundum að foreldrar barna sem hafa slasast reyni að koma börnunum sem fyrst aftur á æfingar. Það sé hins vegar mikilvægt að börnin nái að jafna sig vel áður en þau byrja að æfa aftur. 

„Mér finnst ekkert óeðlilegt við að barnið hafði væntingar. Ég held að allir þeir sem að æfi fótbolta ætli að verða atvinnumenn í fótbolta og komast í landsliðið en það er kannski spurning um að foreldrar dempi sínar væntingar aðeins.“