Ingvar tekur við af Pétri Má hjá Nox Medi­cal

Frá þessu segir í tilkynningu. Þar segir að Ingvar hafi starfað hjá Nox síðastliðin tíu ár og setið í framkvæmdastjórn sem einn af lykilstjórnendum félagsins. Hann hafi haft yfirumsjón með stefnumótun, vörustýringu, markaðsmálum og umbreytingum og sé með tæplega tuttugu ára reynslu sem stjórnandi í vaxtarfyrirtækjum og hafi leitt margar umbreytingar á sínum ferli.

„Pétur Már leiddi félagið þegar það markaði sér stöðu sem fremsta fyrirtæki heims í framleiðslu lækningatækja til svefnrannsókna. Á þeim tíma fjörutíufaldaði félagið tekjur sínar, úr 1 milljón evra í 40 milljónir evra. Starfsmenn Nox Medical telja nú um 120 manns. Pétur leiddi félagið einnig í gegnum árangursríkan samruna við systurfélag Nox Medical í Bandaríkjunum árið 2019 og tók þannig þátt í að skapa Nox Health – leiðandi fyrirtæki í svefnheilbrigðismálum á heimsvísu. Við samrunann gerðist Sigurjón Kristjánsson forstjóri Nox Health og Nox Medical varð sjálfstæð rekstrareining innan þess,“ segir í tilkynningunni.

Um Nox Medical segir að það sé íslenskt hátæknifyrirtæki sem þrói og framleiði mælitæki, hugbúnað, skýjalausnir og gervigreind sem notuð séu af læknum og heilbrigðisstarfsfólki til að mæla lífsmörk í svefni og greina svefnraskanir og svefnsjúkdóma. „Fyrirtækið starfar á alþjóðamarkaði og er leiðandi fyrirtæki á sviði lækningatækja í svefni. Nox Medical er partur af Nox Health, sem er leiðtogi á heimsvísu í svefnheilbrigðislausnum. Árlega fá yfir tvær milljónir einstaklinga greiningu og lausn sinna svefnsjúkdóma með lausnum félagsins,“ segir um fyrirtækið.