Innlent

Fannst rænulítill við hlið rafhlaupahjóls

Samúel Karl Ólason skrifar
Alls voru 82 mál á skrá lögreglu eftir nóttina.
Alls voru 82 mál á skrá lögreglu eftir nóttina. Vísir/Vilhelm

Lögreglunni á höfuðborgarsvæðinu barst í gærkvöldi tilkynning um mann sem lá með skerta meðvitund við hlið rafhlaupahjóls í miðbænum. Sá var fluttur á slysadeild til aðhlynningar. Alls voru 82 mál skráð hjá lögreglu í gærkvöldi og í nótt en í dagbók lögreglunnar segir að þar hafi mest verið um að ræða aðstoðarbeiðnir, tilkynningar um fólk í annarlegu ástandi og hávaðakvartanir.

Ekið var á mann á hlaupahjóli í Breiðholti en ekki er vitað að svo stöddu hvort viðkomandi hafi slasast.

Tilkynning barst einnig um fíkniefni sem fundust í háu grasi undir tré. Maður hafði verið þar á gangi með hund sinn sem þefaði fíkniefnin uppi og voru þau haldlögð af lögreglu. Þá sáu lögregluþjónar kyrrstæðan bíl í Hlíðahverfi en þar hélt maður á barni sem hafði klemmt sig illa á fingri. Var þeim ekið á slysadeild.

Í dagbók lögreglu segir einnig að einhver hafi reynt að brjótast í hús í Grafarvogi. Þar hafði verið reynt að spenna upp glugga en það tókst ekki og er málið til rannsóknar.

Lögregluþjónar voru kallaðir á skemmtistað í Hafnarfirði þar sem maður var með vandræði. Hann neitaði að segja til nafns og var að endingu kærður fyrir brot á lögreglusamþykkt og vistaður í fangageymslu vegna ölvunar.

Nokkrir ökumenn voru handteknir fyrir akstur undir áhrifum áfengis og/eða fíkniefna. Minnst einn þeirra hafði áður verið sviptur ökuréttindum.

Lögreglumál Næturlíf Reykjavík

Mest lesið


Fleiri fréttir

Sjá meira


×

Mest lesið