Allir leikir Íslands í opinni dagskrá á Stöð 2 Sport

Í tilkynningu frá Sýn hf. segir að áhorfendur geti nú horft á strákana okkar í bestu mögulegu myndgæðum og að mikið verði lagt í umfjöllun um leikina. 

Guðmundur Benediktsson mun lýsa leikjunum en umfjöllun verður í umsjón Kjartans Atla Kjartanssonar. Sérfræðingar Stöðvar 2 Sports um landsliðið verða meðal annarra Kári Árnason og Lárus Orri Sigurðsson sem báðir eru margreyndir landsliðs- og atvinnumenn í knattspyrnu.

Yngvi Halldórsson, forstjóri Sýnar, segir frábært að geta fagnað því að íslenska landsliðið séð komið „heim til okkar á Stöð 2 Sport með því að bjóða upp á næstu leiki liðsins í undankeppni EM 2024 í opinni dagskrá með okkar góðu samstarfsaðilum, N1 og Netgíró. Nú eru afar mikilvægir leikir fram undan hjá strákunum okkar. Liðið hefur staðið sig vel og erum við stolt að geta verið hluti af þessari vegferð með þeim. Áfram Ísland!“

Vanda Sigurgeirsdóttir, formaður KSÍ, segist reikna með því að það gleðji þjóðina að getað séð leikina í opinni dagskrá. „Ég hlakka mikið til að fylgjast með umfjöllun Stöðvar 2 Sports um strákana okkar enda mikil reynsla og þekking þar á bæ og ég veit að landsliðinu verða gerð góð skil. Liðið er á ákveðinni vegferð undir stjórn þjálfarans ÅgeHareide og í leikmannahópnum eru reynslumiklir menn í bland við yngri og afar spennandi leikmenn,“ segir Vanda í tilkynningu.

Allir aðrir leikir í undankeppni EM 2024 verða sýndir á Viaplay og valdir leikir á Vodafone Sport, sem er nú hluti af Sportpakka Stöðvar 2 Sport.

Vísir er í eigu Sýnar.