Wise kaupir Þekkingu

Kaupin eru háð samþykki Samkeppniseftirlitsins. Greint er frá kaupunum í tilkynningu en Wise sérhæfir sig í þróun, þjónustu og innleiðingu hugbúnaðarlausna á sviði viðskipta. Þekking hf. er í eigu KEA og eignarhaldsfélagsins Fjöru en það var upphaflega stofnað af KEA og Íslenska hugbúnaðarsjóðnum árið 1999. Var félagið stofnað á grundvelli tölvudeildar Kaupfélags Eyfirðinga (KEA) sem hóf starfsemi árið 1974.

Stærstu eigendur Wise lausna ehf. eru Jónas Hagan Guðmundsson, Edward Mac Gillivray Schmidt og Valgarður Már Valgarðsson.

„Við sjáum gríðarleg tækifæri í því að sameina krafta Wise og Þekkingar. Kjarnastarfsemi fyrirtækjanna er ólík og með styrkleikum beggja getum við boðið viðskiptavinum Wise og Þekkingar mun sterkara og breiðara lausna- og þjónustuframboð“, segir Jóhannes Helgi Guðjónsson, forstjóri Wise, í tilkynningu. 

Henti breikkuðu vöruframboði

Wise hefur séð um sölu og þjónustu á Microsoft Dynamics 365 Business Central viðskiptakerfinu og þróun á viðskiptalausnum því tengdu. Að sögn forsvarsmanna hefur fyrirtækið breikkað vöruframboð sitt á síðustu árum og fært þjónustur sínar í skýjaþjónustur sem hafi kallað á aukið umfang í þjónustu, rekstri og öryggismálum.

Um 60 manns starfa hjá Þekkingu á Akureyri og í Kópavogi sem hefur séð um rekstur tölvukerfa og öryggismál þeirra.

„Starfsfólk Þekkingar býr yfir mikilli reynslu og sérhæfingu sem fellur vel að vegferð Wise og við erum spennt fyrir því að taka þátt í framtíðar uppbyggingu félagsins,“ segir Stefán Jóhannesson, framkvæmdastjóri Þekkingar.

Fréttin hefur verið uppfærð.