Um­hirða potta mætti vera betri

Hreinlæti skiptir miklu máli þegar kemur að umhirðu heitra potta og segir Kristján Berg, eigandi Heitirpottar.is, allt of algengt að eigendur þeirra hafi ekki lært að hugsa rétt um þá. „Það þarf að hugsa vel um heita potta og sinna þeim reglulega,“ segir hann. „Gott hreinlæti lengir líf pottsins og eykur ánægju og vellíðan þeirra sem nota hann. Það er miklu skemmtilegra að fara í hreinan og fallegan pott.“

Hann segir að huga þurfi að nokkrum mikilvægum þáttum þegar kemur að hreinlæti heitra potta. „Ef við skoðum rafmagnspottana fyrst þá er í raun nóg að hugsa um þá tvær mínútur á viku svo hann verði hreinn allt árið um kring. Við byrjum á því að nota „Teststrips“, það segir þér nákvæmlega hvað þú þarft að gera til þess að viðhalda vatninu í pottinum. Fyrst þurfum við að mæla PH gildið, það er mjög einfalt. Það er æskilegt að það sé á bilinu 7,2 og 7,6. Þetta er í sjálfu sér mjög einföld aðgerð. Sonur minn, sem er núna 21 árs, hefur gert þetta hjá okkur frá því hann var sjö ára. Ég kenndi honum þetta þá og hann hefur gert þetta allar götur síðan. Ef hann, sjö ára gamall, gat séð um þetta ættu flestir að ráða við málið.“

Svo þarf að nota klórtöflur eða salttöflur. „Þær eru settar í flotholt sem flýtur alltaf í pottinum. Bara fylla á flotholtið einu sinni í viku. Ég ráðlegg að gera þetta alltaf sama daginn þar sem potturinn er yfirfarinn. Laugardagar eða sunnudagar henta til dæmis vel en þá eru flestir í fríi og ættu að hafa tíma.“

Einu sinni í viku, sama dag og hugsað er um pottinn, þarf að setja eina tsk. af Spa Shock út í vatnið. „Þeir sem eru með rafmagnspott þurfa svo að hugsa vel um síuna sína en það er gert einu sinni í viku. Annað hvort er skolað úr síunni eða þá að vera með einnota síu sem er skipt út á 3-5 mánaða fresti.“

Ef við förum yfir þá sem eru með hitaveitupotta, þá þurfa þeir að huga að öðrum þáttum þegar kemur að hreinlæti segir Kristján. „Þá eru of margir að mínu mati sem vilja alls ekki nota nein hreinsiefni. Það þekkja það flestir að potturinn verður slepjulegur að innan, en það eru óæskilegar bakteríur sem væri gott að vera án. Mjög auðvelt er að viðhalda vatninu í hitaveitupottum. Það þarf bara að vera með klórtöflur eða salttöflur í flotholti og láta fljóta í pottinum.“

Hann segir að ef fólk notar hreinsiefni í pottinn, þá minnka þrifin eftir notkun um 80-90%, sem er frábært fyrir pottaeigandann. „Ekki þarf að mæla PH gildið í hitaveitupottum enda rennur vatnið stöðugt inn og úr pottinum.“

Kristján bendir á fyrirtækið sitt, heitirpottar.is, þjónusti alla pottaeigendur, hvort sem heiti potturinn sé keyptur hjá þeim eða öðrum. „Fyrir okkur er aðalatriðið að pottarnir séu notaðir rétt og þar skiptir hreinlæti miklu máli. Því hvetjum við sem flesta til að leita til okkar eftir aðstoð og fyrir okkur er engin spurning of vitlaus. Við bjóðum einnig upp á lausnir fyrir fólk sem klæjar undan heita vatninu í pottinum, fólk sem er til dæmis með ofnæmi fyrir klór, með exem eða eitthvað slíkt. Hægt er að mæta á staðinn, hringja eða senda okkur tölvupóst. Viðskiptavinir geta auðveldlega pantað öll hreinsiefni á vef okkar, heitirpottar.is, og við sendum heim strax daginn eftir.“