Bílstjórinn rekinn og má reikna með kæru fyrir aksturinn

Vegfarandi lýsti því í samtali við Vísi í gær hvernig flutningabíllinn með tengivagn hefði verið búinn að taka fram úr fimm bílum þegar bíll kom á móti honum. Til að forða sér frá árekstri þurfti flutningabíllinn að sveigja aftur inn á hinn vegarhelminginn með þeim afleiðingum að annar bíll endaði úti í vegarkanti.

Samskip fundaði með bílstjóranum eftir hádegi í dag. Í tilkynningu frá Samkipum segir að fyritækið líti atvikið mjög alvarlegum augum.

„Aksturslagið sem sést á myndbandi sem hefur verið í dreifingu er engan vegin í samræmi við verklag og öryggiskröfur Samskipa. Farið hefur verið yfir atvikið innan Samskipa og viðkomandi starfsmaður hefur lokið störfum hjá fyrirtækinu. Öryggi starfsmanna og vegfarenda er fyrirtækinu gríðarlega mikilvægt og munu áherslur félagsins áfram miðast að því,“ segir í tilkynningu.

Lífi fólks stefnt í hættu

Ásmundur Kr. Ásmundsson, settur yfirlögregluþjónn hjá Lögreglunni á Vesturlandi, segir upptökur af atvikinu hafa borist embættinu í morgun. Rannsóknardeildin sé að vinna í málinu en rannsókn eðlilega ekki langt komin. Haft verði samband við Samskip og óskað eftir upplýsingum um hver hafi setið undir stýri. Viðkomandi verði boðaður í skýrslutöku og myndböndin séu lykilsönnunargagn.

„Þetta er ekki bara fram úr akstur. Þarna er verið að stefna lífi fólks í hættu. Fólk þarf að fara út af veginum, bæði bíll sem kemur á móti og svo þarf bíll við hliðina að forða sér.“

Það komi í hlut saksóknara hjá embættinu fyrir hvers konar brot verði kært.

Ásmundur segir að embættinu hafi borist önnur tilkynning vegna sama ökutækis í gær. Það hafi verið á vegakafla þar sem vegaframkvæmdir taka við af bundnu slitlagi. Flutningabíll Samskipa hafi ekki hægt á ferð sinni heldur ekið yfir malarkafla á veginum. Grjóti hafi rignt yfir bíl á svæðinu.

Óskemmtilegt að fá steina í bílinn

„Hann hefur ekki slegið af þar,“ segir Ásmundur. Þeir hafi auðvitað engar hraðamælingar til að staðfesta þetta en myndir af skemmdum á bílnum segi sína sögu. Hann segir tilganginn augljósan með að draga úr hraða á þessum vegakafla í Borgarfirðinum þar sem framkvæmdir standi yfir.

„Auðvitað er verið að taka niður hraða þar sem vegaframkvæmdir eru til að koma í veg fyrir að fólk skauti út af,“ segir Ásmundur. En um leið að koma í veg fyrir að fólk fái steina í bíla sína. Það sé ekki skemmtilegt með tilheyrandi tjóni og skemmdum á lakki.

Hann á von á því að það mál endi hjá tryggingafélagi viðkomandi.

Ásmundur segir nóg að gera hjá embættinu í umferðarmálum. Þjóðvegurinum fylgi tilheyrandi umferð og embættinu berist fjöldi tilkynninga í hverri einustu viku. Í mörgum tilfellum þegar lögregla nær til sökudólganna komi í ljós að viðkomandi sé í annarlegu ástandi. Algengara sé að um fíkniefni sé að ræða en ölvun.

„Í gamla daga var það ölvunarakstur en núna fíkniefni eða lyfjaakstur. Þetta hefur aðeins snúist við.“

Gripin á myndavél með síma við hönd

Þrír í viku að meðaltali séu grunaðir um akstur undir einhvers konar áhrifum og svo bætist við hraðaaksturinn. Embættið reyni að sporna við því með sýnilegri löggæslu. Því til viðbótar hefur embættið á sinni könnu allar hraðamyndavélar á Íslandi.

„Þetta eru fjögur til fimm þúsund myndir á mánuði. Fólk fær heimsendar sektir og þetta fer allt til ríkisins. Ekki í árshátíðarsjóð hjá okkur eins og einhverjir vilja meina,“ segir Ásmundur á léttum nótum.

Í mörgum tilfellum kemur í ljós á myndunum úr hraðamyndavélum að ökumenn eru með síma við eyrað. Þá bætist við fjörutíu þúsund króna sekt.

„Þó þú segir að þú hafir ekki verið að tala við einhvern þá teljum við ansi góðar líkur á því, þegar einhver er með símann við eyrað, að hann sé að tala við einhvern.“

Banaslys séu of algeng og verði það þar til fólk keyri hægar. Ásmundur bindur vonir við rafmagnsbílana þar sem ökumenn vita, þökk sé tölvubúnaði bílanna, hve langt þeir komast á hraðanum.

„Græjan segir þér að þú komist á Blönduós ef þú keyrir á 90 en bara í Hrútafjörð ef þú keyrir á 120.“

Fréttin er í vinnslu.