Enska liðið West Ham er sigurvegari Sambandsdeildar UEFA eftir 2-1 sigur á Fiorentina í Prag í kvöld. Jarrod Bowen skoraði sigurmark Hamranna á lokamínútu leiksins.
Það var hart barist í Prag í kvöld og hófust lætin með ólátum á milli stuðningsmanna félaganna en fréttir bárust af því að stuðningsmenn Fiorentina hefðu ráðist á stuðningsmenn West Ham í Prag í dag.
Í fyrri hálfleik leiksins í dag gerðu síðan stuðningsmenn West Ham sig seka um slæma hegðun. Plastglösum var kastað í átt að Cristano Biraghi, fyrirliða Fiorentina, þegar hann var að taka hornspyrnu. Eitt glasanna hæfði Biraghi svo að úr blæddi.
Gera þurfti hlé á leiknum til að hjúkra Biraghi en dómari leiksins ákvað þó að halda leik áfram.
Í síðari hálfleik komu síðan mörkin þrjú. West Ham komst yfir með marki úr vítaspyrnu á 62. mínútu en vítið var dæmt eftir að boltinn fór í hönd leikmanns Fiorentina í teignum.
Skömmu síðar jafnaði hins vegar Giacoma Bonaventura fyrir Fiorentina með góðu skoti úr teignum.
Það stefndi síðan allt í framlengingu þegar Jarrod Bowen slapp skyndilega einn í gegnum vörn Fiorentina. Hann gerði vel í að halda varnarmönnum ítalska liðsins frá sér og kláraði af mikill fagmennsku.
Stuðningsmenn West Ham ærðust í stúkunni og David Moyes, knattspyrnustjóri liðsins, sömuleiðis á hliðarlínunni.
Þetta er annar Evróputitill West Ham í sögunni. Liðið vann sigur í UEFA-bikarnum árið 1965 en síðasti stóri titill félagsins kom árið 1980 þegar liðið vann sigur í FA-bikarnum.
