„Held ég sé mjög van­metinn“

Hinn fertugi Grétar Sigfinnur Sigurðarson gerði garðinn frægan með KR þar sem hann var máttarstólpi í liði sem varð Íslandsmeistari tvívegis og bikarmeistari fjórum sinnum á örfáum árum. Hann lék einnig fyrir Sindra, Val, Víking, Þrótt Reykjavík, Stjörnuna og KV á ferli sem spannar 481 KSÍ-leik og 57 mörk.

Í þættinum, líkt og nafnið gefur til kynna, er um að ræða spjallþátt og fór Grétar Sigfinnur yfir víðan völl. KR var þó brennidepli framan af og var Grétar spurður út í umræðuna sem einkenndi hann sem leikmann.

„Ég held ekki og er bara sammála þessu, held ég sé mjög vanmetinn. Ég var náttúrulega hafsent sem leyfði öðrum að njóta sín því ég vildi ekki taka neina sénsa. Ég var eingöngu að hugsa um varnarleikinn. Þá var betra að hafa varnarmann við hliðina á mér sem var kannski betri á boltanum, eins og Skúla Jón [Friðgeirsson].“

„Svoleiðis leikmenn geta þá notið sín vel því þeir geta farið aðeins upp með boltann vitandi að þeir eru með mann við hliðina á sér sem bakkar þá upp.“

„Það var kannski oft það og kannski líka það sem menn – ég var með mest af ferlinum í KR með Óskar Örn [Hauksson] og Mumma [Guðmund Reyni Gunnarsson] á vinstri og ég vinstri miðvörður. Þeir voru ekki mikið í vörn, endaði oft í einhverri tvöföldun á mig. Held að ég hafi stoppað svona 99 prósent af því en það kom fyrir að það klikkaði,“ sagði Grétar Sigfinnur að endingu um leikstíl sinn og þá umræðu sem einkenndi hann að vissu leyti sem leikmann KR.

Þáttinn í heild sinni má heyra hér í spilaranum að ofan.