Öl­gerðin nú meiri­hluta­eig­andi í Iceland Spring

Í tilkynningu segir að fyrir hafi Ölgerðin átt 40 prósenta hlut í Iceland Spring en á grundvelli samninga við aðra hluthafa og Iceland Spring bæti Ölgerðin við sig þriggja prósenta hlut með kaupum á hlutafé af öðrum hluthöfum og átta prósenta hlut með áskrift að nýju hlutafé sem félagið gefi út í tengslum við viðskiptin.

Fram kemur að greiðsla Ölgerðarinnar vegna viðskiptanna nemi samtals rúmlega 500 milljónum króna, eða 3,7 milljónum bandaríkjadala. Iceland Spring verði með viðskiptunum hluti af samstæðu Ölgerðarinnar, en félagið hafi fram til þessa verið hlutdeildarfélag.

„Vatnsútflutningur Iceland Spring ehf. hefur tvöfaldast frá árinu 2020. Árið 2022 var það besta í rekstri félagsins þar sem velta var 2,5 milljarðar og EBITDA félagsins um 250 milljónir króna. Vaxtaberandi skuldir Iceland Spring eru um 400 milljónir króna eftir hlutafjáraukningu auk um 350 milljóna króna kröfu- og birgðafjármögnunar í Bandaríkjunum.

Ölgerðin sér um átöppun og aðra umsýslu fyrir Iceland Spring en félagið á vatnslind skammt frá Hólmsheiði. Ölgerðin er í viðræðum við Reykjavíkurborg um framtíðar uppbyggingu á svæðinu. Á síðasta ári voru framleiddar 33 milljónir flaskna og er gert ráð fyrir söluaukningu á þessu ári. Eftir viðskiptin eru hluthafar Iceland Spring Ölgerðin 51%, Pure Holdings 31%, Three Amigos 13%, Iceland Water með 4% og Houston Point 1%,“ segir í tilkynningunni.