Baldur um Breiðablik: „Óskaplega eðlilegt að spá því að þeir verji titilinn“

„Ég held að horfurnar séu mjög góðar fyrir Breiðablik. Það er óskaplega eðlilegt að spá því að þeir verji titilinn miðað við það sem þeir hafa gert. Þeir hafa verið í áframhaldandi vinnu. Spurningarmerkin voru að þeir misstu tvo bestu mennina sína frá því í fyrra, Ísak [Snæ Þorvaldsson] og Dag Dan [Þórhallsson],“ sagði Baldur sem er einn sérfræðinga Stöðvar 2 Sports um Bestu deildina.

„En þeir fóru aldeilis út á markaðinn og keyptu leikmenn, bættu við hópinn og stækkuðu hann. Þeir ætla klárlega að vera undirbúnir undir þetta mikla álag sem kemur um mitt sumar. Eins og þetta lítur út núna held ég að það sé ekki hægt að búast við öðru en að þeir séu liðið sem hin liðin þurfa að slá út til að ná í bikarinn.“

Baldur segir að áhyggjuefnin sem snúa að Breiðabliki séu ekki mörg en þó nokkur.

„Það er erfitt að sjá mörg áhyggjuatriði en það eru punktar. Í fyrsta lagi er andlega erfitt fyrir leikmenn að verja titil því mér finnst þetta vera jafnara í ár heldur en í fyrra. Þeir munu ekki byrja á sínum heimavelli og ekki komast á þetta skrið eins og í fyrra þar sem þeir unnu fyrstu átta leikina sína,“ sagði Baldur.

„Þeir eru með stóran hóp og það verður verkefni fyrir Óskar [Hrafn Þorvaldsson, þjálfara Breiðabliks] að hópnum sáttum og stórum til að vera klárir í allar keppnir og þegar álagið er sem mest. Þeir eru mjög vel mannaðir í öllum stöðum.“

Fyrsti leikur Breiðabliks í Bestu deildinni er gegn HK mánudaginn 10. apríl.