Fátt sem virðist geta stöðvað Napoli

Napoli hefur verið eitt heitasta lið Evrópu í vetur enda liðið aðeins tapað tveimur deildarleikjum á tímabilinu. Sá seinni kom fyrir viku síðan gegn Lazio og þá voru einhverjir sem veltu því fyrir sér hvort liðið væri að hiksta fyrir lokasprett tímabilsins.

Svarið við því virðist vera nei. Liðið mætti í dag Atalanta á heimavelli í leik sem beðið var með eftirvæntingu þar sem Atalanta er í sjötta sæti og að berjast um Evrópusæti.

Staðan í hálfleik í dag var markalaus en á 60. mínútu kom Georgíumaðurinn frábæri, Khvicha Kvaratskhelia, Napolli yfir þegar hann skoraði eftir sendingu Victor Osimhen. Þrettán mínútum síðar tryggði Amir Rrahmani Napoli síðan 2-0 sigur þegar hann bætti við öðru marki.

Lokatölur í kvöld 2-0 og Napoli endurheimti því átján stiga forskot sitt á toppi deildarinnar. Atalanta er áfram í sjötta sæti, fimm stigum á eftir Roma og AC Milan sem eru í sætunum fyrir ofan.