„Horfum oft á hvor aðra og veltum fyrir okkur hvernig þetta geti eiginlega verið“

Sirrý og Rakel Guðmundsdóttir stofnuðu fyrirtækið Venja sem sendir konum heim 30 daga áskriftarpakka af bætiefnum sem taka mið af því hverjar þarfirnar eru hverju sinni. Enda breytist líkami kvenna mjög mikið yfir ævina.

Þótt Sirrý og Rakel séu góðar vinkonur í dag, er ekkert langt síðan þær kynntust.

Í teboði hjá sameiginlegum vini.

„Við vorum samt búnar að vita af hvor annarri í mörg ár. Hist á sýningum erlendis og þannig. En það var ekki fyrr en þetta kvöld sem við töluðum saman fyrir alvöru.“

Frumskógur og alls kyns tilboð

Sirrý starfaði lengi sem markaðsstjóri Yggdrasill og segir ástríðuna sína í upphafi hafa beinst að því að fólk borðaði lífræna fæðu. Starfið þróaðist þó síðar í að hjá Yggdrasil fór hún að sjá um bætiefnin frá Now.

„Eitt sinn var ég stödd í Nettó þegar þar voru Heilsudagar. Ég fylgdist með fólki í dágóða stund hvernig fólk greip hin og þessi vítamín og setti í körfuna. Og man að ég hugsaði: Annað hvort hendir fólk miklu af þessu eða það fer heim og fer að taka þetta allt. Ég vissi ekki hvort mér þótti verra.“

Sirrý segist hafa kynnst því í starfinu hjá Yggdrasil að þótt bætiefnamarkaðurinn sé yfir 100 ára gamall, er hann mikill frumskógur fyrir neytendur.

„Það er eiginlega ekki hægt að átta sig á því hvað við í raun þurfum að taka inn. Enda þrífst þessi heimur svolítið á því að við séum ekki að skilja það.“

Rakel starfaði hins vegar lengi sem rekstrarstjóri Gló en hún er rekstrarverkfræðingur og hefur yfir höfuð alltaf starfað í fjármálum og rekstri á meðan Sirrý þekkir markaðsmálin.

Þegar Sirrý og Rakel hittust stóðu þær báðar á ákveðnum krossgötum starfsframalega séð.

„Andrés Jónsson hjá Góðum samskiptum er góður vinur minn og hann er rosalega duglegur að halda svona teboð þar sem hann tengir saman fólk. Andrés bauð mér í teboð en ég sagðist ekki hafa neinn áhuga. Við erum hins vegar svo góðir vinir þannig að ég ætlaði að koma og hjálpa honum en tilkynnti mjög formfast að ég yrði ekki áfram um kvöldið,“ segir Sirrý og er greinilega skemmt.

Enda sat hún lengi fram eftir að ræða við Rakel.

Óvænt stefna: Þróuðu sjálfar bætiefnalínu

Sirrý segir þær stöllur oft hafa hlegið af upphafinu hjá sér. Því þær eru báðar varkárar að eðlisfari og þótt fyrir lægi mjög snemma að hugmyndirnar þeirra um hvað mætti betur gera í heimi fæðubótarefnis, tóku þær sér sinn tíma í að kynnast.

„Síðan kom að því að önnur okkar sagði: Ég væri til í að fá símanúmerið þitt,“ segir Sirrý hlæjandi og líkir augnablikinu við það þegar par er búið að hittast í nokkur skipti og vill staðfesta frekari áhuga.

Sem í þeirra tilfelli snérist um að taka af skarið og stofna Venju.

Venja átti upphaflega að höfða til allra sem þyrftu á bætiefnum að halda en snemma í ferlinu sáu Sirrý og Rakel að bætiefnin sem konum bauðst voru einfaldlega ekki þróuð til að styðja við breytilegu þarfir kvenna, en staðreyndin er sú að næringarþörf kvenna tekur sífellt breytingum yfir ævina.

Í stað þess að horfa á alla sem þyrftu á bætiefnum að halda, ákváðu þær að Venja yrði fyrirtæki sem myndi einbeita sér að vítamínum fyrir konur á öllum aldri.

Við sáum fyrir okkur áskriftarmódel þar sem konur gætu keypt 30 daga áskriftir af vítamínum sem væru sérsniðin að þeirra þörfum. 

Markmiðið var að einfalda líf kvenna svo þær þurfi ekki lengur að giska á hvaða bætiefni þær þurfi hverju sinni.

Fljótt kom þó upp babb í bátinn.

„Eitt stærsta vandamálið við bætiefnamarkaðinn er að hann er mjög karllægur og við ætluðum varla að trúa okkar eigin augum þegar að við áttuðum okkur á því að langflest bætiefni taka einungis mið af þörfum karla en ekki kvenna.“ Sem dæmi má nefna að næringartöflur á vítamínum eru miðaðar út frá þörfum karla sem ganga hvorki með barn né fara reglulega á blæðingar og upplifa allt annars konar breytingaskeið.

Það sem vinkonurnar ákváðu því að gera var að heyra í fólki sem starfar í heilbrigðisgeiranum. Læknum, hjúkrunarfræðinga, næringarfræðingum og svo framvegis. Hér heima og erlendis.

„Við héldum fyrst að þessi hópur fólks væri frekar skeptískur á bætiefni og jafnvel á móti þeim. En komust að því andstæða. Það sem heilbrigðisfólki er hins vegar illa við er þessi ofneysla á fæðubótarefnum þar sem fólk er að taka inn hitt og þetta sem það þarf ekki á að halda.“

Úr varð að áður en stöllurnar vissu af, voru þær farnar að þróa heila bætiefnalínu frá grunni.

Konur fyrir konur

Bætiefnin sem Venja framleiðir eru framleidd í Hollandi. Þau eru einungis seld sem áskriftarþjónusta í gegnum vefsíðuna venja.is. Sirrý segir það alveg geta komið til greina síðar að Venja sæki á erlenda markaði. Þar er þá sérstaklega horft til Skandinavíu þar sem íslenskar konur og skandinavískar glíma við svipaðaðar áskoranir. Til dæmis minni joðneyslu kvenna á barneignaraldri.

Viðtökurnar segir Sirrý hafa verið framar björtustu vonum.

„Við horfum oft á hvor aðra og veltum fyrir okkur hvernig þetta geti verið, það viti enginn af okkur! Okkur óraði ekki fyrir því að við myndum vaxa svona hratt. En það staðfestir bara hvað konur eru leitandi að lausnum til að finna það sem hentar þeim og þeirra líkama miðað við hvar þær eru staddar í dag.““ segir Sirrý og bætir við:

„Við vorum svo heppnar að fá styrk frá Frumkvöðlaauði Kviku sem hjálpaði okkur mikið en að öðru leyti höfum við verið að fjármagna þetta sjálfar. Sem er lífsins lukka út af fyrir sig því það sem gerist í svona frumkvöðlastarfsemi er að þegar það er ekki mikill peningur að moða úr, er maður þvingaður til að einblína alltaf á aðalatriðin og halda fókus. Við erum því þakklátar fyrir að hafa þróað vöruna og byrjað eins og við gerðum. “

Báðar eru þær með heimili og börn að sinna líka og viðurkennir Sirrý að auðvitað kalli rekstur á ungu fyrirtæki á smá púsluspil. Það sem hafi hins vegar komið í ljós er að Sirrý og Rakel vinna mjög vel saman, enda gengu þær alla leið áður en farið var af stað.

Við tókum svona persónuleikapróf. Svona eins og gert er þegar fólk er ráðið í nýtt starf. Nema að við gerðum þetta fyrir hvor aðra vegna þess að við vorum að kynnast. 

En sáum líka hvar styrkleikarnir liggja hjá okkur og það má segja að verkefnaskiptingin hjá okkur taki svolítið mið af því hvað kom út úr þessum prófi.“

Hvar sæir þú Venju fyrir þér í framtíðinni?

„Það tók okkur um tvö ár að þróa konseptið en sem fyrirtæki verðum við eins árs þann 17.mars næstkomandi. Við erum auðvitað bara að horfa til íslenskra kvenna og þeirra þarfa en ef ég svara þessu út frá háleitari markmiðum þá langar okkur að breyta þessari úreltu nálgun bætiefna frá því að þar sé verið að benda á eina pillu sem hentar konum alla ævi eða einhverjar tískubylgjur, yfir í að konur fái góða leiðsögn og ráðgjöf um hvaða bætiefni eru réttu vítamínin fyrir þær og þennan margslungna og breytilega líkama sem kvenlíkaminn er.“