Mun kæra Steinar Þór vegna ætlaðra brota á siða­reglum lög­manna

Sigurður er nú staddur erlendis í fríi en er væntanlegur til landsins á morgun og mun þá stilla upp kæru, eins og hann orðar það í samtali við Vísi.

Lindarhvolsmálið heldur áfram að vinda upp á sig, það er flókið, marglaga og teygir anga sína víða. Steinar Þór er verjandi ríkisins í málinu en hann er jafnframt einn helsti aðalleikarinn í því. 

Bjarni Benediktsson fjármálaráðherra stofnaði félagið Lindarhvol ehf. til að annast úrvinnslu og umsýslu svokallaðra stöðugleikaeigna ríksins, eignir sem fallið höfðu til ríkisins í tengslum við nauðasamninga slitabúa fallinna fjármálafyrirtækja. 

Lögmannsstofunni Íslögum var falið að halda utan um rekstur Lindarhvols en Íslög eru í eigu Steinars Þórs. Hann var jafnframt stjórnarmaður í Klakka (áður Exista) en mál Frigusar gegn ríkinu snýst um sölu á þeirri eign. Hann er þannig vitni í málinu.

Telur hópfund lögmannsins með stjórninni afar vafasaman

Arnar Þór Stefánsson, lögmaður Frigusar, vakti athygli á þessari nástöðu Steinars Þórs við málflutning í héraði og kom inn á það að áður en til vitnaleiðslu kom hafi Steinar Þór fundað með öðrum vitnum, stjórn Lindarhvols. „Ég veit ekki hvort lögmaðurinn áttar sig á því hversu alvarlegt þetta er, að funda með nokkrum vitnum. Þá líklegast að rifja upp og fara yfir framburðina fyrir dómi,“ er haft eftir Arnari Þór í frétt Viðskiptablaðsins en þar segir af því að Arnar Þór hafi óskað eftir því að Steinar Þór viki sem lögmaður í málinu. 

Steinar Þór hélt því fram í sínum málflutningi að ástæða fundarins hafi verið aldur og heilsa Þórhalls Arasonar stjórnarformanns Lindarhvols, því hafi verið mikilvægt að rifja upp málsatvik með honum.

Sigurði Valtýssyni segir þetta ekki standast skoðun.

„Þetta atvik verður kært. Þessi hópfundur,“ segir Sigurður sem bendir á að ef funda hefði átt með vitni til að rifja upp atvik á þeim forsendum að það vitni væri orðið heilsutæpt þá hefði Steinar átt að geta hitt hann einan. 

„Það var engin ástæða fyrir stjórnina alla að hittast með lögmanni, hvað þá með sitjandi varamanni á þeim tíma, Ester Finnbogadóttur og núverandi hæstaréttardómaranum Ásu Ólafsdóttur, meðstjórnanda í stjórn Lindarhvols. Mér hefur verið bent á að vert sé að senda inn erindi vegna þessa til nefndar um störf dómara en ég er en nú ekki alveg kominn þangað.“

Enginn mundi neitt þrátt fyrir upprifjunarfundinn

Sigurður telur ekki úr vegi að ætla að fundurinn hafi snúist um að samræma vitnisburð.

„Þetta er svo galið. Svo situr maður í réttarhaldinu og það man samt enginn neitt nema það sem er hagstætt fyrir Lindarhvol. Um hvað var þá þessi upprifjunarfundur? Ég get hlegið að þessu og orðið pirraður í senn. Sérstakur upprifjunarfundur haldinn en samt man enginn neitt nema það sem er hagstætt!?“

Sigurður Valtýsson segir það hafa verið upplifun að fylgjast með málflutningnum. Á köflum eins og í leikhúsi fáránleikans. Steinar Þór hafi verið ríkisverjandinn, vitnið og svo seljandinn í málinu.

„Hann mætir í skikkju, klæðir sig svo úr skikkjunni til að fara í vitnastúku, fer svo og klæðir sig aftur í skikkjuna og spyr spurninga.“

Sigurður Valtýsson segir að Steinar Þór hafi verið allt í öllu í starfsemi Lindarhvols þó hann vilji þræta fyrir það núna og gera minna en meira úr sínum hlut. Og þó allt þetta megi heita grátbroslegt er málið grafalvarlegt. Sigurður ætlar að kæruna muni hann senda í lok næstu viku, í það minnsta í þessum mánuði. Sigurður veit ekki hvort það hafi vægi í málinu sem slíku en honum þykir auka á alvarleika þess að Steinar sé settur ríkislögmaður í málinu.

Siðareglurnar sem eru undir

Vísir hefur rætt við lögmenn um þennan þátt málsins og þeir hafa bent á að fundurinn kunni að stangast á við ákvæði siðareglna lögmanna, nánar tiltekið 21. grein. Þeir mega tala við vitni og fá fram afstöðu en aldrei hafa áhrif á vitnisburð fyrir fram. Framburður vitna er mikilvægur og ekki megi hitta mörg vitni á sama staðnum og láta þau heyra hvert ofan í annað því þá sé hætta á að þau smiti hvert annað með afstöðu eða afstöðuleysi eftir atvikum.

Þessa klásúlu var lengi vel ekki að finna í siðareglunum lögmanna en var bætt við að öllum líkindum í kjölfar og vegna hæstaréttardóms sem féll í Al Thani-málinu svokölluðu 12. febrúar 2015. En þar segir meðal annars:

„Vegna aðfinnsla, sem fram komu í garð tveggja verjenda ákærðu í niðurlagi hins áfrýjaða dóms og vikið hefur verið að hér áður, er rétt að taka fram að hvorki er í lögum nr. 88/2008 lagt berum orðum bann við því að verjandi eigi samtal við mann, sem ráðgert er að gefi skýrslu sem vitni við aðalmeðferð máls fyrir dómi, né verður ályktað af ákvæðum laganna að hindrun sé lögð við því. Geri verjandi þetta ber honum á hinn bóginn að gæta þess af varfærni að leitast við að hafa engin áhrif á framburð, sem vitni á eftir að gefa.“